ആദിത്യ എല്‍ വണ്‍ നാലാംഘട്ട ഭ്രമണപഥ ഉയര്‍ത്തലും വിജയകരമാണെന്ന് ഐഎസ്ആര്‍ഒ

ഭൂമി വിടാനൊരുങ്ങി ആദിത്യ എൽ വൺ. നാലാംഘട്ട ഭ്രമണപഥ ഉയർത്തലും വിജയകരമാണെന്ന് ഐഎസ്ആർഒ. ഭൂമിയിൽ നിന്ന് 256 മുതൽ 121,973 കിലോമീറ്റർ പരിധിയിലുള്ള ഭ്രമണപഥത്തിലെത്തി. ലഗ്രാഞ്ച് പോയിന്റിലേക്കുള്ള യാത്ര 19ന് ആരംഭിക്കും.

ഇതിനോടകം മൂന്ന് തവണയാണ് ആദിത്യ എൽ വണ്ണിന്റെ ഭ്രമണപഥം ഉയർത്തിയത്. ആദ്യം സെപ്റ്റംബർ മൂന്നാം തീയ്യതിയും പിന്നീട് സെപ്റ്റംബർ അഞ്ചാം തീയ്യതിയും മൂന്നാം തവണ സെപ്തംബർ 10നും ഭ്രമണപഥം ഉയർത്തി. നാലാം തവണ ഭ്രമണപഥം ഉയർത്തൽ പൂർത്തിയായതിന് ശേഷം പേടകം ഭൂമിയുടെ ഭ്രമണപഥം വിട്ട് ഒന്നാം ലഗ്രാഞ്ച് പോയിന്റിലേക്കുള്ള യാത്ര തുടങ്ങിയിരിക്കുകയാണ്.

നാല് മാസം നീളുന്ന യാത്രയാണ് ആദിത്യ എൽ ഒന്നിന്റെ മുന്നിലുള്ളത്. ഭൂമിയിൽ നിന്ന് 15 ലക്ഷം കിലോമീറ്റർ അകലെ ഒന്നാം ലഗ്രാഞ്ച് പോയിന്റിലേക്കാണ് പേടകത്തെ അയക്കുന്നത്. എൽ വണ്ണിന് ചുറ്റുമുള്ള ഹാലോ ഓർബിറ്റിൽ പേടകത്തെ സ്ഥാപിക്കുകയാണ് ലക്ഷ്യം. സൂര്യനെ പഠിക്കാനുള്ള ആദിത്യ എൽ 1, ഇസ്രോയുടെ മറ്റ് ദൗത്യങ്ങളിൽ നിന്ന് ഏറെ വ്യത്യസ്തമാണ്. ഇസ്രൊയ്ക്കപ്പുറമുള്ള ശാസ്ത്ര സ്ഥാപനങ്ങളുടെ പങ്കാളിത്തം മുതൽ പോകുന്നയിടം വരെ ഈ ദൗത്യത്തെ വേറിട്ട് നിർത്തുന്നു.