യുക്രെയ്ന്‍ രക്ഷാദൗത്യത്തില്‍ ഇടപെടല്‍ ആവശ്യപ്പെട്ട് നല്‍കിയ ഹര്‍ജി പരിഗണിക്കാന്‍ വിസമ്മതിച്ച്‌ സുപ്രീംകോടതി. ഇക്കാര്യത്തില്‍ കോടതിക്ക് എന്ത് ചെയ്യാനാകുമെന്ന് ചീഫ് ജസ്റ്റീസ് ചോദിച്ചു. റൊമാനിയ അതിര്‍ത്തിയില്‍ നിന്ന് ഇന്ത്യക്കാരെ രക്ഷപ്പെടുത്താന്‍ ഇടപെടണമെന്ന് ആവശ്യപ്പെട്ടാണ് ഹര്‍ജി നല്‍കിയത്.
റഷ്യന്‍ പ്രസിഡന്‍റിനോട് യുദ്ധം നിര്‍ത്താന്‍ തനിക്ക് പറയാനാകുമോ? രക്ഷാദൗത്യം പുരോഗമിക്കുന്നുണ്ടല്ലോയെന്നും ചീഫ് ജസ്റ്റീസ് പറഞ്ഞു. ഇക്കാര്യത്തില്‍ കേന്ദ്ര സര്‍ക്കാരിന് കൂടുതല്‍ എന്ത് ചെയ്യാനാകുമോയെന്ന് ചോദിക്കാമെന്നും ചീഫ് ജസ്റ്റീസ് വ്യക്തമാക്കി.
യുക്രെയ്ന്‍ വിഷയത്തില്‍ കേന്ദ്ര സര്‍ക്കാരും നിലപാട് വ്യക്തമാക്കി. പ്രധാനമന്ത്രി റഷ്യന്‍, യുക്രെയ്ന്‍ പ്രസിഡന്‍റുമാരോട് സംസാരിച്ചു. രക്ഷാദൗത്യം ഏകോപിപ്പിക്കാന്‍ നാലു മന്ത്രിമാരെ നിയോഗിച്ചതായും എജി കോടതിയെ അറിയിച്ചു. വിദ്യാര്‍ഥികള്‍ ഇപ്പോഴും അവിടെയുണ്ടെന്നും സംവിധാനങ്ങള്‍ ഫലപ്രദമായി ഉപയോഗിക്കണമെന്നും കോടതി ആവശ്യപ്പെട്ടു.