ഇരിങ്ങാലക്കുട ശ്രീ കൂടല്‍മാണിക്യം ക്ഷേത്രം കൂത്തമ്പലത്തിലെ ജാതിവിലക്ക് നീക്കാന്‍ ദേവസ്വം ഭരണസമിതി യോഗത്തില്‍ തീരുമാനം. അമ്മന്നൂര്‍ ചാക്യാര്‍ കുടുംബത്തി‍െന്‍റ അവകാശങ്ങള്‍ എല്ലാം നിലനിര്‍ത്തി അവരുടെ പരിപാടികള്‍ അരങ്ങേറാത്ത അവസരങ്ങളില്‍ ഹൈന്ദവരായ മറ്റ് കൂത്ത്, കൂടിയാട്ടം പ്രതിഭകള്‍ക്കും കൂത്തമ്പലത്തിൽ കൂടിയാട്ടം നടത്താന്‍ അനുവാദം നല്‍കാനാണ് തീരുമാനം. അനുമതിക്കായി ദേവസ്വം മന്ത്രിയെയും ദേവസ്വം കമീഷണറെയും സമീപിക്കാനും തീരുമാനിച്ചിട്ടുണ്ട്.
കൂടല്‍മാണിക്യം ക്ഷേത്രത്തിലെയും തൃശൂര്‍ വടക്കുന്നാഥനിലെയും കൂത്തമ്പലങ്ങളിലെ ജാതി വിലക്ക് വലിയ ചർച്ചയായിരുന്നു. തൃപ്പൂണിത്തുറ, കൊടുങ്ങല്ലൂര്‍ എടവിലങ്ങ് ക്ഷേത്രങ്ങളിലെ കാല്‍കഴുകിച്ചൂട്ട് വഴിപാട് വിവാദമാവുകയും ദേവസ്വം മന്ത്രി കെ രാധാകൃഷ്‌ണൻ ഇടപെട്ട് തടയുകയും ചെയ്തു. കൂടല്‍മാണിക്യം, വടക്കുന്നാഥന്‍ കൂത്തമ്പലങ്ങളിലെ ജാതിവിലക്ക് സാംസ്കാരിക പ്രവര്‍ത്തകയായ രേണു രാമനാഥനാണ് സമൂഹ മാധ്യമങ്ങളിലൂടെ പുറത്തറിയിച്ചത്. പിന്നീട് സാംസ്കാരിക – രാഷ്ട്രീയ കേന്ദ്രങ്ങളിൽ രേണുവിന്റെ പോസ്റ്റ് സജീവ ചർച്ചയായിരുന്നു.