ലോക വനിതാ ദിനാഘോഷത്തോടനുബന്ധിച്ച് വനിതകൾക്ക് മാത്രമായി സംസ്ഥാനത്തെ വിവിധ ടൂറിസം കേന്ദ്രങ്ങളിലേക്ക് കെഎസ്ആർടിസി നടത്തുന്ന വനിതാ യാത്ര സൂപ്പർ ഹിറ്റ്. നെയ്യാറ്റിൻകര നിംസിലെ വനിതാ ജീവനക്കാർക്കായി നടത്തിയ മൺറോതുരുത്ത്, സാബ്രാണിക്കൊടി, തിരുമല്ല വാരം ബീച്ച് എന്നിവിടങ്ങളിലേക്കുള്ള യാത്രയുടെ ഉദ്ഘാടനം തിരുവനന്തപുരം സെൻട്രൽ സ്റ്റാൻഡിൽ നവകേരള മിഷൻ ഡയറക്ടർ ഡോ.ടി എൻ സീമ നിർവഹിച്ചു.
കെഎസ്ആർടിസി സൗത്ത് സോൺ എക്സി.ഡയറക്ടർ ജി അനിൽകുമാർ, നൂറുൽ ഇസ്ലാം സർവകലാശാല പ്രോ-വൈസ് ചാൻസലർ ഡോ.എം എസ് ഫൈസൽഖാൻ, നെയ്യാറ്റിൻകര എടിഒ എസ്. മുഹമ്മദ് ബഷീർ തുടങ്ങിയവർ പങ്കെടുത്തു. യാത്രയോട് അനുബന്ധിച്ച് നിംസ് മെഡിസിറ്റിയിലെ വനിതാ ജീവനക്കാർ ഫ്ലാഷ് മോബും അവതരിപ്പിച്ചു.
ഇതോടൊപ്പം സംസ്ഥാനത്തുടനീളം 100 വനിതകൾ മാത്രമുള്ള വിവിധ ട്രിപ്പുകളും നടത്തി. കൊച്ചി വണ്ടർലായുമായി സഹകരിച്ച് 20 ട്രിപ്പുകളും. താമരശേരി യൂണിറ്റിൽ നിന്നും 16 വനിതാ ഉല്ലാസയാത്രകളും നടത്തി. തിരുവനന്തപുരം സോഷ്യൽ സർവീസ് സൊസൈറ്റിയുമായി സഹകരിച്ച് തീരദേശ വനിതകൾ പങ്കെടുക്കുന്ന നാലുനാൾ നീളുന്ന തിരുവനന്തപുരം – കോഴിക്കോട് വനിതാ യാത്രയും ആരംഭിച്ചു.
കോട്ടയത്ത് നവജീവൻ ട്രസ്റ്റിന് കീഴിൽ പ്രവർത്തിക്കുന്ന സ്നേഹക്കൂട്ടിലെ വനിതാ അന്തേവാസികൾക്കായി വാഗമണ്ണിലേക്ക് സ്നേഹ സ്വാന്തന യാത്രയും നടത്തി. മാർച്ച് 8 മുതൽ 13 വരെയാണ് കെഎസ്ആർടിസി ബഡ്ജറ്റ് ടൂർസ് “വനിതാ യാത്രാ വാരം – Womens Travel Week” ആയി ആഘോഷിക്കുന്നത്.