ഇന്ന് 75000 കോടി രൂപ മൂല്യമുള്ള ‘ബുക്ക് മൈ ഷോ’യുടെ തുടക്കം ഒരു ടെക്സ്റ്റ് മെസ്സേജ്

0
140

ഇന്ത്യയിൽ മൂവി ടിക്കറ്റുകൾ, സ്പോർട്ടിങ് ഇവന്റുകൾ, കൺസേർട്ടുകൾ തുടങ്ങിയവ ബുക്ക് ചെയ്യുന്ന പ്രമുഖ ബുക്കിങ് ആപ്ലിക്കേഷനാണ് ബുക്ക് മൈ ഷോ (Book My Show). 75000 കോടി രൂപയാണ് ഇന്നത്തെ കമ്പനിയുടെ മൂല്യം. കമ്പനിയുടെ സഹസ്ഥാപകനും സിഇഒയുമാണ് ആഷിഷ് ഹേം രജനി. അവിചാരിതമായ ഒരു ടെക്സ്റ്റ് മെസേജാണ് ഈ കമ്പനിയുടെ ബിസിനസ് ആശയം യാഥാർത്ഥ്യമായി മാറാൻ കാരണമായത്. പരീക്ഷിത് ദാർ, രാജേഷ് ബാൽപാണ്ഡേ എന്നിവർക്കൊപ്പമാണ് ആഷിഷ് ബുക്ക് മൈ ഷോ സ്ഥാപിക്കുന്നത്.

മുംബൈ സർവ്വകലാശാലയ്ക്ക് കീഴിലുള്ള സൈഡൻഹാം ഇൻസ്റ്റിറ്റ്യൂട്ട് ഓഫ് മാനേജ്മെന്റിലെ പൂർവ്വവിദ്യാർത്ഥികളായിരുന്നു മൂവരും. ബുക്ക് മൈ ഷോ സ്ഥാപിക്കുന്നതിന് മുമ്പ് ജെ. വാൾട്ടർ തോംസൺ എന്ന പ്രശസ്തമായ പരസ്യ കമ്പനിയിൽ ക്ലയന്റ് & അക്കൗണ്ട് മാനേജ്മെന്റ് വിഭാഗത്തിൽ ആഷിഷ് ജോലി ചെയ്തിരുന്നു.

അവിചാരിതമായ ഒരു ടെക്സ്റ്റ്മെസേജ് വഴിയാണ് ബുക്ക് മൈ ഷോയുടെ ബിസിനസ് ആശയം യാഥാർത്ഥ്യമാകുന്നതെന്ന് ഒരു അഭിമുഖത്തിൽ ആഷിഷ് പറഞ്ഞിരുന്നു. 1999ൽ താൻ ഒരു ബിസിനസ് ആശയം തന്റെ ബോസിനോട് ടെക്സ്റ്റ് മേസേജിലൂടെ പങ്കുവെച്ചതായി അദ്ദേഹം പറയുന്നു. “ഒരു കുഴപ്പവുമില്ല, ആ ആശയവുമായി മുന്നോട്ടു പോവുക” എന്നായിരുന്നു ബോസിന്റെ മറുപടി.

മാർക്കറ്റിങ്, അഡ്വർൈടൈസിങ് മേഖലകളിൽ പശ്ചാത്തലമുള്ള ആഷിഷ്, കമ്പനി യാഥാർത്ഥ്യമാകുന്നതിൽ വലിയ പങ്കാണ് വഹിച്ചത്. മൾട്ടി പ്ലെക്സുകളും, ഇലക്ട്രോണിക് പേയ്മെന്റ് രീതികളും തരംഗമായതോടെ ബാക്ക് എൻഡ് ടിക്കറ്റിങ് സേവനങ്ങൾ നൽകുന്ന ഒരു പ്ലാറ്റ്ഫോമായി ബുക്ക് മൈ ഷോ മാറിയിരുന്നു.

ബുക്ക് മൈ ഷോയുടെ പഴയ പേര് ‘Go For Ticketing’ എന്നായിരുന്നു. 2002ൽ കമ്പനി ‘India Ticketing’ എന്ന നാമം സ്വീകരിച്ചു. കമ്പനിയുടെ ബ്രാൻഡ് നാമത്തിൽ വീണ്ടും മാറ്റം വരുത്താൻ ജീവനക്കാർക്കിടയിൽ കമ്പനി ഒരു മത്സരം സംഘടിപ്പിച്ചു. 2007ൽ ഒരു ഇന്റേൺ എൻജിനീയറിങ് വിദ്യാർത്ഥിയാണ് ‘Book My Show’ എന്ന ആശമുള്ള പേര് നിർദേശിച്ചത്. ഈ സമീപനത്തിലൂടെ കമ്പനിയുടെ ലക്ഷ്യം മുൻനിർത്തി ബിസിനസ് വികസിപ്പിക്കാൻ സാധിച്ചു.

ബിഗ് ട്രീ എന്റെർടെയിൻമെന്റ് പ്രൈവറ്റ് ലിമിറ്റഡാണ് 1999ൽ സ്ഥാപിതമായ കമ്പനിയുടെ ഉടമസ്ഥരും, ഓപ്പറേറ്ററും. ബുക്ക് മൈ ഷോ എന്ന പേരിൽ റീ ബ്രാൻഡ് ചെയ്ത ബിസിനസ് 2007ൽ ആണ് അവതരിപ്പിക്കുന്നത്. ഇന്ത്യയിലെ 650ൽ അധികം നഗരങ്ങളിലും, പട്ടണങ്ങളിലും ഈ പ്ലാറ്റ്ഫോം, സേവനങ്ങൾ ലഭ്യമാക്കുന്നു. രാജ്യത്താകമാനം 6000ൽ അധികം സ്ക്രീനുകളിലെ സിനിമകൾ, ലൈവ് മ്യൂസിക് ഷോകൾ അടക്കമുള്ള ഇവന്റുകൾ തുടങ്ങിയവയുടെയെല്ലാം ബുക്കിങ് സാധ്യമാക്കുന്നു. റിപ്പോർട്ടുകൾ പ്രകാരം, ഇന്ന് ബുക്ക് മൈ ഷോ 75000 കോടി രൂപ അഥവാ 900 മില്യൺ ഡോളർ മൂല്യമുള്ള ഒരു കമ്പനിയാണ്.