ലണ്ടൻ: ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിനെ വിമർശിച്ച് കാർട്ടൂൺ വരച്ചതിനു പിന്നാലെ കാർട്ടൂണിസ്റ്റിനെ പുറത്താക്കി ‘ദി ഗാർഡിയൻ’ പത്രം. നെതന്യാഹുവിനെ ഗാസയുമായി ബന്ധപ്പെടുത്തി കാർട്ടൂൺ വരച്ച സ്റ്റീവ് ബെല്ലിനെയാണ് ഗാർഡിയൻ പുറത്താക്കിയത്. 42 വർഷമായി ഗാർഡിയനിൽ കാർട്ടൂണിസ്റ്റായി പ്രവർത്തിക്കുന്നയാളാണ് സ്റ്റീവ്.
സ്റ്റീവിന്റെ കരാർ ഇനി പുതുക്കില്ലെന്ന് പത്രത്തിന്റെ മാനേജ്‌മെന്റ് അറിയിച്ചതായി അൽ ജസീറ അടക്കമുള്ള അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. നെതന്യാഹുവിനെതിരായി കാർട്ടൂൺ ജൂതവിരുദ്ധമാണെന്ന് ആരോപിച്ചാണ് നടപടി.
രണ്ട് കൈകളിലും ബോക്സിങ് ഗ്ലൗവുകൾ അണിഞ്ഞ് ഗാസ മുനമ്പിന്റെ ഭൂപടത്തിനു മുകളിൽ നിൽക്കുന്ന നെതന്യാഹുവിനെ സ്റ്റീവ് വരച്ചത്. ‘ഗാസ വാസികളേ, പുറത്തുകടക്കൂ’ എന്ന ക്യാപ്ഷനോടുകൂടിയായിരുന്നു കാർട്ടൂൺ. ഷേക്സ്പിയറിന്റെ വെനീസിലെ വ്യാപാരിയിലെ കഥാപാത്രം ഷൈലോക്കുമായി നെതന്യാഹുവിനെ താരതമ്യം ചെയ്യുകയാണെന്ന വ്യാഖ്യാനങ്ങളും കാർട്ടൂൺ പുറത്തു വന്നതിന് പിന്നാലെ വന്നിരുന്നു.