കഴിഞ്ഞ കുറച്ച് വർഷങ്ങളായി അതിർത്തിയിൽ സംഘർഷം നിലനിന്നിരുന്നെങ്കിലും ഇന്ത്യയും ചൈനയും തമ്മിലുള്ള വ്യാപാരം റെക്കോർഡ് തലത്തിൽ തുടരുകയായിരുന്നു. എന്നാൽ വർഷങ്ങൾക്ക് ശേഷം ഇപ്പോൾ ഉഭയകക്ഷി വ്യാപാരം കുറഞ്ഞു വരുകയാണ്. ഇരു രാജ്യങ്ങളും തമ്മിലുള്ള വ്യാപാരത്തിൽ 0.9 ശതമാനം ഇടിവാണ് രേഖപ്പെടുത്തിയിരിക്കുന്നത്.
ചൈനയുടെ മൊത്തം വിദേശ വ്യാപാരത്തിൽ അഞ്ച് ശതമാനം ഇടിവ് രേഖപ്പെടുത്തിയപ്പോഴാണ് ഉഭയകക്ഷി വ്യാപാരത്തിൽ ഈ ഇടിവ് സംഭവിച്ചത്. കോവിഡിന് ശേഷം മന്ദഗതിയിലായ സമ്പദ്വ്യവസ്ഥയാണ് ചൈനയുടെ വിദേശ വ്യാപാരം കുറയാൻ കാരണം. ഈ വർഷം ആദ്യ പകുതിയിൽ ഇന്ത്യയിലേക്കുള്ള ചൈനയുടെ കയറ്റുമതി 56.53 ബില്യൺ ഡോളറാണ്. ഇത് കഴിഞ്ഞ വർഷത്തെ 57.51 ബില്യൺ ഡോളറിൽ നിന്ന് 0.9 ശതമാനം ഇടിവാണ് രേഖപ്പെടുത്തിയത്.
അതേസമയം, ചൈനയിലേക്കുള്ള ഇന്ത്യയുടെ കയറ്റുമതി കഴിഞ്ഞ വർഷത്തെ 9.57 ബില്യൺ ഡോളറുമായി താരതമ്യം ചെയ്യുമ്പോൾ 9.49 ബില്യൺ ഡോളറാണ്.2023 ന്റെ ആദ്യ പകുതിയിലെ വ്യാപാര കമ്മി കഴിഞ്ഞ വർഷത്തെ 67.08 ബില്യൺ ഡോളറിനെ അപേക്ഷിച്ച് 47.04 ബില്യൺ ഡോളറായി കുറഞ്ഞു.ഒരു രാജ്യം കയറ്റുമതിയെക്കാൾ കൂടുതൽ ഇറക്കുമതി ചെയ്യുന്നതിനെയാണ് വ്യാപാരക്കമ്മിയായി പരിഗണിക്കുന്നത്.
2022 ഇന്ത്യ-ചൈന വ്യാപാരത്തിന് വളരെ നല്ല വർഷമായിരുന്നു.കാരണം, 2022 മെയ് മാസത്തിൽ, കിഴക്കൻ ലഡാക്കിൽ സൈനിക തർക്കത്തെത്തുടർന്ന് പിരിമുറുക്കം ഉണ്ടായിരുന്നിട്ടും, ഇരു രാജ്യങ്ങളും തമ്മിൽ 135.98 ബില്യൺ ഡോളറിന്റെ റെക്കോർഡ് വ്യാപാരം നടന്നു. അക്കാലത്ത് ഇന്ത്യ-ചൈന വ്യാപാരത്തിൽ 8.4 ശതമാനം വർധനവുണ്ടായി.2021ൽ ഉഭയകക്ഷി വ്യാപാരം 125 ബില്യൺ ഡോളറായിരുന്നു.2022-ൽ, ഉഭയകക്ഷി ബന്ധങ്ങളിലെ ഉയർച്ച താഴ്ചകൾക്കിടയിലും, ചൈനയുമായുള്ള ഇന്ത്യയുടെ വ്യാപാര കമ്മി ആദ്യമായി 100 ബില്യൺ ഡോളർ കടന്നു.2021 ൽ ചൈനയുമായുള്ള ഇന്ത്യയുടെ വ്യാപാര കമ്മി 69.38 ബില്യൺ ഡോളറായിരുന്നു, ഇത് 2022 ൽ 101.02 ബില്യൺ ഡോളറായി ഉയർന്നു.
ഇന്ത്യ-ചൈന വ്യാപാരത്തിൽ മാന്ദ്യം
ഈ വർഷം ആദ്യ പകുതിയിൽ ഇന്ത്യ-ചൈന വ്യാപാരത്തിൽ മാന്ദ്യം അനുഭവപ്പെട്ടു. ചൈനയുടെ മൊത്തം വ്യാപാരം ഒരു വർഷം മുമ്പത്തെ അപേക്ഷിച്ച് ഏകദേശം 5 ശതമാനം കുറഞ്ഞു.ചൈനയുടെ കയറ്റുമതി 3.2 ശതമാനവും ഇറക്കുമതി 6.7 ശതമാനവും കുറഞ്ഞു.
കഴിഞ്ഞ ജൂണിൽ, കോവിഡിന് ശേഷം സമ്പദ്വ്യവസ്ഥ വീണ്ടെടുക്കുന്നതിനാൽ ചൈനയുടെ കയറ്റുമതിയും ഗണ്യമായി (12.4 ശതമാനം) കുറഞ്ഞിരുന്നു.തുടർന്ന് പണപ്പെരുപ്പം തടയാൻ, ചൈനയിലെ സെൻട്രൽ ബാങ്കുകൾ പലിശ നിരക്ക് ഉയർത്തി. അത് ഡിമാൻഡ് കുറച്ചു. ഇപ്പോൾ ചൈനയുടെ ആഗോള ഇറക്കുമതി 6.8 ശതമാനം കുറഞ്ഞ് 214.7 ബില്യൺ ഡോളറിലെത്തിയതായി ചൈനീസ് കസ്റ്റംസ് ഡിപ്പാർട്ട്മെന്റ് വ്യാഴാഴ്ച പുറത്തുവിട്ട കണക്കുകൾ വ്യക്തമാക്കുന്നു.
ചൈനയുടെ സമ്പദ് വ്യവസ്ഥ മന്ദഗതിയിലായി
പകർച്ചവ്യാധിക്ക് ശേഷം ചൈനയുടെ സാമ്പത്തിക വീണ്ടെടുക്കലിന്റെ ദ്രുതഗതിയിലുള്ള വേഗത കുറഞ്ഞുവെന്നാണ് ചൈനയുടെ വ്യാപാരത്തെക്കുറിച്ചുള്ള നിരാശാജനകമായ കണക്കുകൾ കാണിക്കുന്നതെന്ന് വിശകലന വിദഗ്ധർ പറയുന്നു.
‘ഈ കണക്കുകൾ ബലഹീനതയുടെ സൂചനയാണ്. ഇത് വരും കാലങ്ങളിൽ ചൈനയുടെ കയറ്റുമതിയിൽ കൂടുതൽ സമ്മർദ്ദം ചെലുത്താൻ സാധ്യതയുണ്ട്.ചൈന അതിന്റെ ആഭ്യന്തര ആവശ്യത്തെ ആശ്രയിച്ചിരിക്കുന്നു.ഇത്തരമൊരു സാഹചര്യത്തിൽ സർക്കാരിൽ നിന്ന് വലിയ പ്രോത്സാഹനമില്ലാതെ അടുത്ത ഏതാനും മാസങ്ങൾക്കുള്ളിൽ ആഭ്യന്തര ഡിമാൻഡ് വീണ്ടും ഉയരുമോ എന്നതാണ് വലിയ ചോദ്യം.’, സൗത്ത് ചൈന മോണിംഗ് പോസ്റ്റിനോട് സംസാരിച്ച പിൻപോയിന്റ് അസറ്റ് മാനേജ്മെന്റിന്റെ ചീഫ് ഇക്കണോമിസ്റ്റ് ഷാങ് ഷിവെ പറഞ്ഞു.
ചൈനയുടെ ഏറ്റവും വലിയ വ്യാപാര പങ്കാളിയായ അസോസിയേഷൻ ഓഫ് സൗത്ത് ഈസ്റ്റ് ഏഷ്യൻ നേഷൻസ് (ആസിയാൻ രാജ്യങ്ങൾ) രാജ്യങ്ങളിലേക്കുള്ള ചൈനയുടെ കയറ്റുമതിയും 16.86 ശതമാനം കുറഞ്ഞു. യൂറോപ്യൻ യൂണിയനിലേക്കുള്ള കയറ്റുമതിയും ഓരോ വർഷവും കുറയുന്നു. ഈ അർദ്ധ വർഷത്തിൽ അത് 12.92 ശതമാനം കുറഞ്ഞു.യുഎസിലേക്കുള്ള ചൈനയുടെ കയറ്റുമതി ഒരു വർഷം മുമ്പുള്ളതിൽ നിന്ന് 23.7 ശതമാനം ഇടിഞ്ഞ് 42.7 ബില്യൺ ഡോളറായി. കണക്കുകൾ പ്രകാരം യുഎസുമായുള്ള ചൈനയുടെ വ്യാപാര ലാഭം 30.6 ശതമാനം കുറഞ്ഞ് 28.7 ബില്യൺ ഡോളറായി.എന്നിരുന്നാലും, ജൂൺ മാസത്തിൽ, റഷ്യയിലേക്കുള്ള ചൈനയുടെ കയറ്റുമതി കഴിഞ്ഞ വർഷം ഇതേ മാസത്തെ അപേക്ഷിച്ച് 90.93 ശതമാനം വർദ്ധിച്ചു.
വിദേശ വ്യാപാരം തിരികെ കൊണ്ടുവരാൻ..
ഈ വർഷത്തിന്റെ അവസാന മാസങ്ങളിൽ വിദേശ വ്യാപാരം തിരികെ കൊണ്ടുവരാൻ ചൈന സമ്മർദ്ദം നേരിടേണ്ടി വരുമെന്ന് ചൈനീസ് കസ്റ്റംസ് ഡിപ്പാർട്ട്മെന്റ് വക്താവ് ലു ഡാലിയാങ് പറഞ്ഞു. ‘ലോകത്തെ വികസിത സമ്പദ്വ്യവസ്ഥകൾ പണപ്പെരുപ്പത്തിന്റെ ആഘാതം നേരിടുന്നു. ജിയോപൊളിറ്റിക്കൽ വൈരുദ്ധ്യങ്ങൾ ഇപ്പോഴും നടക്കുന്നുണ്ട്, ആഗോള ഡിമാൻഡിൽ ഉടനടി വർദ്ധനവ് ഉണ്ടാകാൻ സാധ്യതയില്ല’, റഷ്യ-യുക്രൈൻ യുദ്ധത്തിന്റെ പശ്ചാത്തലത്തിൽ അദ്ദേഹം ചൂണ്ടിക്കാട്ടി. പകർച്ചവ്യാധിക്ക് ശേഷം ചൈനട സമ്പദ്വ്യവസ്ഥ പുനർനിർമ്മിക്കുകയാണെന്നും വിദേശ വ്യാപാരം ചുരുങ്ങിയ സമയത്തിനുള്ളിൽ നല്ല ദിശയിലേക്ക് നീങ്ങുമെന്നും ലു കൂട്ടിച്ചേർത്തു.