ഇന്ത്യൻ സ്പേസ് റിസർച്ച് ഓർഗനൈസേഷൻ (ഇസ്രോ) തങ്ങളുടെ ചരിത്രപരമായ ചന്ദ്രയാൻ-3 ദൗത്യം വെള്ളിയാഴ്‌ച വിക്ഷേപിക്കാൻ ഒരുങ്ങുകയാണ്. ശ്രീഹരിക്കോട്ടയിലെ സതീഷ് ധവാൻ സ്പേസ് സെന്ററിലാണ് വിക്ഷേപണം നടക്കുക.
ശ്രീഹരിക്കോട്ടയിലെ രണ്ടാമത്തെ വിക്ഷേപണത്തറയിൽ നിന്ന് ജൂലൈ 14 ഉച്ചയ്ക്ക് 2.35ന് ഷെഡ്യൂൾ ചെയ്‌തിരിക്കുന്ന ഈ ദൗത്യം ചാന്ദ്ര പേടകത്തെ ചന്ദ്രനിലേക്കുള്ള ഒരു ഓർബിറ്റിലേക്ക് നയിക്കും. വിജയകരമായ വിക്ഷേപണത്തിന് ആവശ്യമായ എല്ലാ മാനദണ്ഡങ്ങളും പാലിച്ചതിനാൽ ഇസ്രോയുടെ മിഷൻ റെഡിനസ് റിവ്യൂ കമ്മിറ്റി വിക്ഷേപണത്തിന് അംഗീകാരം നൽകിയിരുന്നു.
സമിതിയുടെ അംഗീകാരത്തിന് പിന്നാലെ ചന്ദ്രയാൻ-3 ദൗത്യത്തിന് വിക്ഷേപണ അംഗീകാര ബോർഡും അനുമതി നൽകിയിരുന്നു. എല്ലാം ആസൂത്രണം അനുസരിച്ച് നടന്നാൽ, 43.5 മീറ്റർ LVM-3 ലോഞ്ച് റോക്കറ്റ് ചന്ദ്രനിലേക്കുള്ള യാത്ര ആരംഭിക്കുന്നതിന് മുമ്പ് പേടകത്തെ ഒരു ദീർഘവൃത്താകൃതിയിലുള്ള ഭൗമ ഭ്രമണപഥത്തിലേക്ക് അയയ്ക്കും. ചന്ദ്രന്റെ ദക്ഷിണധ്രുവത്തിന് സമീപം ഷെഡ്യൂൾ ചെയ്‌ത ലാൻഡിംഗ് ഓഗസ്‌റ്റ് 23ന് നടക്കുമെന്നാണ് പ്രതീക്ഷ.
ബഹിരാകാശത്തേക്ക് വലിയ രീതിയിലുള്ള പേലോഡ് വഹിക്കാനുള്ള കഴിവിന് പേരുകേട്ട ഹെവി-ലിഫ്റ്റ് ലോഞ്ച് വെഹിക്കിളാണ് എൽവിഎം-3. ഇസ്രോ വികസിപ്പിച്ചെടുത്ത ഏറ്റവും ശക്തമായ റോക്കറ്റാണ് ഇത്. റോക്കറ്റുകളുടെ ‘ബാഹുബലി’ എന്നറിയപ്പെടുന്ന എൽവിഎം-3, രണ്ട് ഖര-ഇന്ധന ബൂസ്‌റ്ററുകളും ഒരു ലിക്വിഡ്-ഇന്ധന കോർ സ്‌റ്റേജും ഉൾക്കൊള്ളുന്ന മൂന്ന്-ഘട്ട റോക്കറ്റാണ്. ഖര-ഇന്ധന ബൂസ്‌റ്ററുകൾ പ്രാരംഭ ത്രസ്‌റ്റ് നൽകുന്നു, അതേസമയം ദ്രവ-ഇന്ധന കോർ ഘട്ടമാണ് റോക്കറ്റിനെ ഭ്രമണപഥത്തിലേക്ക് നയിക്കുന്നതിന് സുസ്ഥിരമായ ത്രസ്‌റ്റ് ഉറപ്പാക്കുന്നത്.
ചന്ദ്രന്റെ ദക്ഷിണധ്രുവ മേഖലയ്ക്ക് സമീപം ഒരു റോവറിനെ വിന്യസിക്കാൻ രൂപകൽപ്പന ചെയ്‌ത 2 മീറ്റർ ഉയരമുള്ള ലാൻഡർ ഈ ദൗത്യത്തിൽ ഉൾപ്പെടുന്നു. തുടർച്ചയായ പരീക്ഷണങ്ങൾ നടത്തി ഏകദേശം രണ്ടാഴ്‌ചയോളം റോവർ പ്രവർത്തിക്കുമെന്നാണ് പ്രതീക്ഷിക്കുന്നത്.
ഐഎസ്ആർഒയുടെ മുൻ ദൗത്യമായ ചന്ദ്രയാൻ-2, 2020-ൽ ഒരു ഓർബിറ്ററിനെ വിജയകരമായി വിന്യസിച്ചിരുന്നു. എന്നാൽ ചന്ദ്രയാൻ 3ന്റെ ടച്ച്ഡൗൺ സൈറ്റിന് സമീപമുണ്ടായ ഒരു അപകടത്തിൽ അതിന്റെ ലാൻഡറും റോവറും നിർഭാഗ്യവശാൽ നശിച്ചു. ഇന്നുവരെ സോവിയറ്റ് യൂണിയൻ, യുണൈറ്റഡ് സ്‌റ്റേറ്റ്സ്, ചൈന എന്നീ രാജ്യങ്ങൾ മാത്രമേ ചന്ദ്രനിൽ വിജയകരമായി സോഫ്റ്റ് ലാൻഡിംഗ് പൂർത്തിയാക്കിയിട്ടുള്ളൂ.
സ്വകാര്യ ബഹിരാകാശ വിക്ഷേപണങ്ങളിലും ഉപഗ്രഹ അധിഷ്ഠിത വ്യവസായത്തിലും നിക്ഷേപം പ്രോത്സാഹിപ്പിക്കുന്നതിന് ലക്ഷ്യമിട്ടുള്ള കേന്ദ്ര നയങ്ങളുടെ പ്രഖ്യാപനത്തിന് ശേഷമുള്ള രാജ്യത്തെ ആദ്യത്തെ പ്രധാന ദൗത്യമാണ് ഇസ്രോയുടെ ഈ വിക്ഷേപണം.