പ്രശസ്ത മേക്കപ് ആർട്ടിസ്റ്റിനെതിരെ ലൈംഗിക പീഡന പരാതിയുമായി യുവതികൾ. കല്യാണ മേക്കപ്പിനിടെ ലൈംഗികാതിക്രമം നടത്തിയെന്ന ഇവരുടെ പരാതിയിൽ എറണാകുളം ചളിക്കവട്ടത്തെ ബ്രൈഡൽ മേക്കപ് സ്‌റ്റുഡിയോ ഉടമ കാക്കനാട്‌ സ്വദേശി അനീസ്‌ അൻസാരെക്കെതിരെ പാലാരിവട്ടം പൊലീസ് കേസെടുത്തു.
കേരളത്തിന്‌ പുറത്ത്‌ താമസിക്കുന്ന മൂന്ന് യുവതികളാണ്‌ സിറ്റി പൊലീസ് കമീഷണർ സി എച്ച്‌ നാഗരാജുവിന്‌ ഇ–-മെയിലിൽ പരാതി നൽകിയത്‌. കേരളത്തിൽ വിവിധ സ്ഥലങ്ങളിൽ ഇയാളുടെ ബ്രൈഡൽ മേക്കപ് സ്‌റ്റുഡിയോയ്‌ക്ക്‌ ശാഖകളുണ്ട്‌. പ്രമുഖർ ഉൾപ്പെടെയുള്ളവർക്ക്‌ ഇയാൾ മേക്കപ് ചെയ്‌തിട്ടുണ്ട്‌.
യുവതികൾ ഒരാഴ്ചമുമ്പ് ഇയാൾക്കെതിരെ ‘മീടു’ പോസ്റ്റ് ഇട്ടിരുന്നു. ചക്കരപ്പറമ്പിലെ ബ്രൈഡൽ മേക്കപ് സ്‌റ്റുഡിയോയിൽ പീഡിപ്പിച്ചതായാണ്‌ പരാതിയിലുള്ളത്‌.മീടു പോസ്റ്റ് ശ്രദ്ധയിൽപ്പെട്ട ഉടനെ സ്വമേധയാ അന്വേഷണം തുടങ്ങിയിരുന്നുവെന്ന് സിറ്റി പൊലീസ് കമീഷണർ പറഞ്ഞു. പോസ്റ്റ് വന്ന ദിവസം ഇയാൾ ദുബായിലേക്ക്‌ കടന്നതായി സംശയിക്കുന്നു. മൊബൈൽഫോൺ സിച്ച്‌ ഓഫാണ്‌.