കമ്പാർട്ടുമെന്റിൽ കയറുന്നതിനിടെ മുന്നോട്ടുനീങ്ങിയ ട്രെയിനിനും പ്ലാറ്റ്ഫോമിനും ഇടയില്‍ കുടുങ്ങി മലയാളി യുവാവ് മരിച്ചു. മലയാളിയും കുടക് വീരാജ്പേട്ട് കല്ലുവാനാ ഹമീദ് -റാബിയ ദമ്പതികളുടെ മകനുമായ മുഹമ്മദ് റാഫിയാണ് (27) മരിച്ചത്. മാണ്ഡ്യ റെയില്‍വേ സ്റ്റേഷനില്‍ കഴിഞ്ഞദിവസം വൈകിട്ടാണ് അപകടമുണ്ടായത്.
മൈസൂരുവിലെ ഐ ടി കമ്പനിയിലെ ജീവനക്കാരനായ റാഫി ബംഗളൂരുവില്‍ പോയി ട്രെയിനില്‍ മടങ്ങിവരുന്നതിനിടെയാണ് അപകടം. മാണ്ഡ്യ റെയില്‍വേ സ്റ്റേഷനില്‍ ട്രെയിന്‍ നിര്‍ത്തിയപ്പോള്‍ വെള്ളം വാങ്ങാന്‍ ഇറങ്ങിയതായിരുന്നു റാഫി. തിരിച്ചുകയറുന്നതിനിടെ ട്രെയിൻ നീങ്ങിയിരുന്നു. ഇതിനിടെ കാൽ വഴുതിവീണ് ട്രെയിനിനും പ്ലാറ്റ്ഫോമിനും ഇടയില്‍ കുരുങ്ങുകയായിരുന്നു.
ആശുപത്രിയിലെത്തിച്ചെങ്കിലും മരിച്ചു. പൊലീസ് നടപടികൾക്കുശേഷം മൃതദേഹം വിരാജ്പേട്ടയിൽ എത്തിച്ച് ഖബറടക്കി. സഹോദരങ്ങള്‍: മഹറൂഫ്, ഫന്‍സീറ, നിഷാദ്, ജംഷീദ്, ഷംസീര്‍, സാദിഖ്, സാജിദ്.