കോഴിക്കോട് ഇരട്ട സ്ഫോടന കേസിൽ തടിയന്റവിട നസീർ അടക്കമുള്ള പ്രതികളെ ഹൈക്കോടതി വെറുതെ വിട്ടു. വിചാരണ കോടതി വിധിച്ച ശിക്ഷ റദ്ദാക്കണമെന്ന് ആവശ്യപ്പെട്ട് ഒന്നാം പ്രതി തടിയന്റവിട നസീര്, നാലാം പ്രതി ഷഫാസ് എന്നിവരാണ് കോടതിയെ സമീപിച്ചത്. കേസിലെ മൂന്നാം പ്രതി അബ്ദുള് ഹാലിം, ഒന്പതാം പ്രതി അബൂബക്കര് യൂസഫ് എന്നിവരെ വെറുതെ വിട്ട നടപടി ചോദ്യം ചെയ്ത് ദേശീയ അന്വഷണ ഏജന്സി (എന്ഐഎ) സമർപ്പിച്ച അപ്പീലും ഹൈക്കോടതി തള്ളി. പ്രതികളെ വെറുതെ വിട്ട വിചാരണ കോടതി വിധി ഹൈക്കോടതി ശരിവെച്ചു.
തടിയന്റവിട നസീറിന് മൂന്നു ജീവപര്യന്തവും ഷഫാസിനെ ഇരട്ട ജീവപര്യന്തം തടവിനുമാണ് എന്ഐഎ കോടതി ശിക്ഷിച്ചിരുന്നത്. പ്രതികള്ക്കെതിരെ മതിയായ തെളിവുകളില്ലെന്ന് ചൂണ്ടിക്കാട്ടിയാണ് ഹൈക്കോടതി ഡിവിഷന് ബെഞ്ചിന്റെ ഉത്തരവ്.
2006 മാര്ച്ച് മൂന്നിനാണ് കോഴിക്കോട് മൊഫ്യൂസല് ബസ് സ്റ്റാന്ഡിലും കെഎസ്ആര്ടിസി സ്റ്റാന്ഡിലും സ്ഫോടനം നടന്നത്. ആദ്യം ലോക്കല് പോലിസ് അന്വേഷിച്ച കേസ് പിന്നീട് എന് ഐ എ (ദേശീയ അന്വേഷണ ഏജന്സി) ഏറ്റെടുക്കുകയായിരുന്നു.