കൊട്ടിയൂര് പീഡനക്കേസില് പ്രതിയായ മുന് വൈദികന് റോബിന് വടക്കുംചേരിയെ വിവാഹം കഴിക്കാന് അനുമതി തേടി പെണ്കുട്ടി സുപ്രീം കോടതിയെ സമീപിച്ചു. വിവാഹം കഴിക്കാനുള്ള തീരുമാനം സ്വന്തം ഇഷ്ടപ്രകാരമാണെന്ന് പെണ്കുട്ടി സുപ്രീം കോടതിയില് സമര്പ്പിച്ച ഹര്ജിയില് വിശദീകരിച്ചിട്ടുണ്ട്. ഇരയുടെ ആവശ്യം ജസ്റ്റിസുമാരായ വിനീത് ശരണ്, ദിനേശ് മഹേശ്വരി എന്നിവര് അടങ്ങിയ ബെഞ്ച് തിങ്കളാഴ്ച്ച പരിഗണിക്കും.
കൊട്ടിയൂര് പീഡന കേസില് റോബിന് വടക്കുംചേരിക്ക് മൂന്ന് വകുപ്പുകളിലായി അറുപത് വര്ഷത്തെ കഠിനതടവ് ആണ് തലശേരി പോക്സോ കോടതി വിധിച്ചത്. എന്നാല് മൂന്നുശിക്ഷയും ഒരുമിച്ച് 20 വര്ഷത്തെ കഠിന തടവ് അനുഭവിച്ചാല് മതി.
ഉഭയ സമ്മത പ്രകാരമുള്ള ലൈംഗിക ബന്ധമാണ് പ്രതിയുമായി ഉണ്ടായിരുന്നതെന്ന് ഇര നേരത്തെ ഹൈക്കോടതിയില് പറഞ്ഞിരുന്നു. ഇരയേയും കുഞ്ഞിനെയും സംരക്ഷിച്ചുകൊള്ളാമെന്ന് പ്രതി റോബിന് വടക്കുംചേരിയും ഹൈക്കോടതിയെ അറിയിച്ചിരുന്നു. എന്നാല് ഈ വാദം ഹൈക്കോടതി തളുകയായിരുന്നു. അതിനു ശേഷമാണ് ഇര സുപ്രീം കോടതിയെ സമീപിച്ചിരിക്കുന്നത്. തനിക്കും കുഞ്ഞിനും റോബിന് വടക്കുംചേരിക്ക് ഒപ്പം താമസിക്കാന് അവസരം ഒരുക്കണമെന്ന് സുപ്രീം കോടതിയില് ഫയല് ചെയ്ത ഹര്ജിയിലെ ആവശ്യം. വിവാഹത്തിനായി റോബിന് വടക്കുംചേരിക്ക് ജാമ്യം അനുവദിക്കണം എന്നതാണ് ഹര്ജിയിലെ മറ്റൊരു ആവശ്യം.
സുപ്രീംകോടതിയുടെ മുന്വിധിന്യായങ്ങളുടെ അടിസ്ഥാനത്തില് ലൈംഗിക അതിക്രമക്കേസുകളില് ഒത്തുതീര്പ്പുകളോ അയഞ്ഞ സമീപനമോ സ്വീകരിക്കാനാകില്ലെന്ന് റോബിന് വടക്കുംചേരിയുടെ ആവശ്യം തള്ളിക്കൊണ്ട് ഹൈക്കോടതി വ്യക്തമാക്കിയിരുന്നു. സംഭവം നടക്കുമ്പോള് പെണ്കുട്ടിക്ക് പ്രായപൂര്ത്തിയായിട്ടില്ലായിരുന്നെന്നാണ് വിചാരണക്കോടതി കണ്ടെത്തിയത്.
2016 ലായിരുന്നു കേസിനാസ്പദമായ സംഭവം. കൊട്ടിയൂര് നീണ്ടുനോക്കി സെയിന്റ് സെബാസ്റ്റ്യന്സ് പള്ളി വികാരി ആയിരുന്ന റോബിന് വടക്കുംചേരി പള്ളിമേടയില് വെച്ച് പ്രായപൂര്ത്തിയാകാത്ത പെണ്കുട്ടിയെ പീഡിപ്പിച്ച് ഗര്ഭിണിയാക്കി എന്നതാണ് കേസ്.