പകര്ച്ച വ്യാധി തടയാനായി ഓരോ മെഡിക്കല് കോളേജിലും പ്രത്യേക ബ്ലോക്ക് അനുവദിക്കുമെന്ന് ബജറ്റില് പ്രഖ്യാപനം. ഇതിനായി 50 കോടി അനുവദിച്ചു. തിരുവന്തപുരം, കോഴിക്കോട് മെഡിക്കല് കോളജുകളില് ഈ വര്ഷം തന്നെ ബ്ലോക്ക് പ്രവര്ത്തനമാരംഭിക്കുമെന്നും ധനമന്ത്രി വ്യക്തമാക്കി.
കൊവിഡിന്റെ പശ്ചാത്തലത്തില് ആരോഗ്യമേഖലയ്ക്ക് ഊന്നല് നല്കിയുള്ളതാണ് ബജറ്റ്. 20,000 കോടിയുടെ രണ്ടാം കൊവിഡ് പാക്കേജ് ധനമന്ത്രി പ്രഖ്യാപിച്ചു. 2800 കോടി കൊവിഡ് പ്രതിരോധത്തിനായിരിക്കും.
8000 കോടി നേരിട്ട് ജനങ്ങളിലേക്ക് എത്തിക്കുമെന്നും ധനമന്ത്രി ബജറ്റില് വ്യക്തമാക്കി. കൊവിഡ് പ്രതിരോധത്തിനായി ബജറ്റില് ആറിന പരിപാടി കൂടി പ്രഖ്യാപിച്ചു. എല്ലാ സിഎച്ച്സി, താലൂക് ആശുപത്രികളിലും 10 ഐസൊലേഷന് കിടക്കകള് അനുവദിക്കുമെന്ന് ധനമന്ത്രി വ്യക്തമാക്കി. ഇതിനായി 635 കോടി അനുവദിച്ചു.