മുഖ്യമന്ത്രി പിണറായി വിജയന് ഇന്ന് 76 വയസ് തികഞ്ഞു. ഇത്തവണ രണ്ടാം പിണറായി സർക്കാരിൻറെ ആദ്യനിയമസഭാ സമ്മേളനം തുടങ്ങുന്ന ദിവസം തന്നെ പിണറായി വിജയൻറെ ജന്മദിനവുമെന്ന പ്രത്യേകതയുണ്ട്.1945 മേയ് 24നാണ് പിണറായി വിജയൻ ജനിച്ചത്.
നിയമസഭാ സമ്മേളനം തുടങ്ങുന്ന ദിവസമെന്നതിനപ്പുറം മറ്റ് പ്രത്യേകതകളൊന്നുമില്ലെന്നും ആഘോഷങ്ങളോ ചടങ്ങുകളോ ഒന്നുമില്ലെന്നും മുഖ്യമന്ത്രിയുടെ ഓഫീസറിയിച്ചു.
5 വർഷം മുൻപ് അതായത് ഒന്നാം പിണറായി സർക്കാരിൻറെ സത്യപ്രതിജ്ഞക്ക് തലേന്നാളാണ് ആദ്യമായി പിണറായി വിജയൻ തൻറെ ജൻമദിനത്തെ കുറിച്ച് തുറന്നു പറഞ്ഞത്. 5 വർഷങ്ങൾക്കിപ്പുറം മറ്റൊരു ജന്മദിനം കടന്ന് വരുമ്പോൾ പിണറായി വിജയന് കൂട്ടായി കേരളരാഷ്ട്രീയത്തിലെ അത്യപൂർവമായൊരു ചരിത്രം കൂടിയുണ്ട്. തുടർഭരണത്തിന് നേതൃത്വം കൊടുത്ത ക്യാപ്റ്റനെന്ന ചരിത്രം.
99 സീറ്റിൻറെ ജന്മദിന സമ്മാനമാണ് കേരളജനത പിണറായിക്ക് നൽകിയിരിക്കുന്നത്. രാജ്യത്തിനഭിമാനമായ കേരളനിയമസഭയിൽ 140 ൽ 99 പേരുടെ ഉറച്ച പിന്തുണയുമായി ജന്മദിനത്തിൽ സഭാസമ്മേളനം തുടങ്ങാനായെന്ന ഇരട്ടിമധുരവും പിണറായിക്കുണ്ട്.