കേരളത്തിലെ ഇടതുപക്ഷ വിജയത്തെ അഭിനന്ദിച്ച് അയർലാൻഡിലെ സോഷ്യലിസ്റ്റ് നേതാവായ എലിസ് റയാൻ. ഫേസ്ബുക്കിലൂടെയാണ് വർക്കേഴ്സ് പാർട്ടി നേതാവും ഡബ്ലിൻ സിറ്റി കൗൺസിൽ അംഗവുമായ എലിസ് റയാൻ പിണറായി വിജയന്റെ നേതൃത്വത്തിലുള്ള എൽഡിഎഫ്
സർക്കാരിന്റെ രണ്ടാംവരവിനെ പ്രകീർത്തിച്ച് രംഗത്തുവന്നത്.
3.4 കോടി ജനസംഖ്യയുള്ള ഇന്ത്യയിലെ ഒരു സംസ്ഥാനമായ കേരളം മികച്ച ഭൂരിപക്ഷത്തോടെ കമ്യൂണിസ്റ്റ് സർക്കാറിനെ അധികാരത്തിലെത്തിച്ചിരിക്കുകയാണ്. മികച്ച രീതിയിൽ കോവിഡ് പ്രതിസന്ധി കൈകാര്യം ചെയ്ത പാർട്ടിയെ അധികാരത്തിലെത്തിച്ച കേരള ജനത നവ ലിബറൽനയങ്ങളിൽ നിന്ന് ഒരുനാൾ നമുക്ക് മോചനം നേടാനാവുമെന്ന പ്രതീക്ഷയാണ് നൽകുന്നതെന്ന് അവർ പറഞ്ഞു.
മുതലാളിത്തത്തിന്റെ ബദൽ തെരഞ്ഞെടുത്ത എല്ലാ മലയാളി സഖാക്കളേയും അഭിവാദ്യം ചെയ്യുകയാണെന്നും അവർ വ്യക്തമാക്കി. ബിജെപിക്ക് കേരളത്തിലുണ്ടായിരുന്ന ഒരു സീറ്റ് നഷ്ടപ്പെട്ടുവെന്നും ദേശീയതലത്തിൽ തിരിച്ചടിയേറ്റുവെന്നും പോസ്റ്റിൽ വ്യക്തമാക്കുന്നുണ്ട്. റയാന്റെ പോസ്റ്റ് വന്നതോടെ നിരവധി മലയാളികളാണ് പോസ്റ്റിൽ പ്രതികരണവുമായി എത്തിയത്. ആയിരത്തിനടുത്ത് പേർ ഇതിൽ കമന്റ് ചെയ്തിട്ടുണ്ട്.