രാജ്യത്ത് വാക്സിന് ക്ഷാമം കാരണം ജനങ്ങൾ നെട്ടോട്ടമോടുമ്പോൾ മധ്യപ്രദേശിൽ 2.4 ലക്ഷം ഡോസ് കോവിഡ് വാക്സിനുമായി ട്രക്ക് ഉപേക്ഷിക്കപ്പെട്ട നിലയില്‍.
നര്‍സിഗപൂര്‍ ജില്ലയില്‍ കറേലി ബസ് സ്റ്റാന്‍ഡിന് സമീപമാണ് ഉപേക്ഷിച്ച നിലയിൽ ട്രാക്ക് കണ്ടെത്തിയത്. കോവാക്സിന്റെ 2.4 ലക്ഷം യൂണിറ്റുകളാണ് ട്രക്കിലുണ്ടായിരുന്നത്. ട്രക്ക് കണ്ടെത്തിയെന്ന വിവരത്തെതുടര്‍ന്ന് പൊലീസ് സംഭവസ്ഥലത്തെത്തി.
ഡ്രൈവറെ കാണാത്തതിനെത്തുടർന്ന് ട്രാക്ക് തുറന്നു പരിശോധിച്ചപ്പോഴാണ് വന്‍തോതില്‍ വാക്സിൻ ശേഖരം കണ്ടെത്തിയത്. എട്ട് കോടി രൂപ വില വരുന്ന വാക്സിനാണ് ട്രക്കിലുണ്ടായിരുന്നത്.
ട്രക്കിന്റെ ശീതികരണ സംവിധാനത്തിന്റെ പ്രവര്‍ത്തനം നിര്‍ത്താത്തതിനാല്‍ വാക്സിന് കേടൊന്നും സംഭവിച്ചിട്ടില്ലെന്ന് പൊലീസ് അറിയിച്ചു. സംഭവത്തിൽ അന്വേഷണം ഊർജിതമാക്കിയിട്ടുണ്ടെന്ന് പൊലീസ് അറിയിച്ചു.