ഇന്ത്യൻ മെഡിക്കൽ അസോസിയേഷനെതിരെ വർഗീയ പ്രസ്താവന നടത്തി ബാബാ രാംദേവിൻറെ സഹായി ബാലകൃഷ്ണ. രാജ്യത്തെ ക്രിസ്തുമതത്തിലേക്ക് പരിവർത്തനം ചെയ്യാൻ ഇന്ത്യൻ മെഡിക്കൽ അസോസിയേഷൻ ശ്രമിക്കുന്നുവെന്നാണ് സഹായി പറഞ്ഞത്.
രാംദേവിനെ ഐഎംഎ ലക്ഷ്യമാക്കുന്നത് രാജ്യത്തെ ക്രിസ്തുമതത്തിലേക്ക് നയിക്കുന്നതിന് വേണ്ടിയാണ്. പൗരൻമാർ ഇനിയും ഉണർന്ന് പ്രവർത്തിച്ചില്ലെങ്കിൽ വരും തലമുറ നിങ്ങൾക്ക് മാപ്പ് തരില്ലെന്ന് ബാലകൃഷ്ണ ട്വിറ്ററിൽ കുറിച്ചു.
ഐഎംഎ പ്രസിഡൻറ് ഡോ. ജെ.എ. ജയലാലാണ് മതപരിവർത്തനത്തിന് നേതൃത്വം നൽകുന്നതെന്നും അദ്ദേഹം ആരോപിച്ചു. അതേസമയം, ബാലകൃഷ്ണയുടെ ട്വീറ്റിനെതിരേ ഡോക്ടർമാർ ഉൾപ്പെടെ നിരവധിപ്പേർ വിമർശനവുമായി രംഗത്തെത്തിയി‌ട്ടുണ്ട്.
അലോപ്പതി ചികിത്സ വിഡ്ഢിത്തമാണെന്ന രാംദേവിൻറെ പ്രസ്താവനയ്ക്കെതിരേ ഇന്ത്യൻ മെഡിക്കൽ അസോസിയേഷൻ നേരത്തേ രംഗത്തെത്തിയിരുന്നു. കോവിഡ് രോഗികളിലെ ചികിത്സയ്ക്കായി ഡ്രഗ്സ് കൺട്രോളർ ജനറൽ അനുമതി നല്കിയ റംഡിസീവർ, ഫവിഫ്ലൂ തുടങ്ങിയ മരുന്നുകൾ പരാജയമാണെന്നുമാണ് രാംദേവ് പറഞ്ഞത്.
പരാമർശം വിവാദമായതോടെ രാംദേവിനോട് പ്രസ്താവന പിൻവലിക്കണമെന്ന് കേന്ദ്ര ആരോഗ്യമന്തി ഹർഷവർധൻ ആവശ്യപ്പെട്ടിരുന്നു അലോപ്പതി മരുന്നുകൾ രാജ്യത്തെ കോടിക്കണക്കിനാളുകളുടെ ജീവൻ രക്ഷിച്ചിട്ടുണ്ട്. കോവിഡ് മുന്നണിപ്പോരാളികളുടെ ആത്മധൈര്യം ചോർത്തുന്ന പ്രസ്താവന പിൻവലിക്കണമെന്ന് രാംദേവിനു നല്കിയ കത്തിൽ കേന്ദ്രമന്ത്രി ആവശ്യപ്പെട്ടു. പിന്നാലെ രാംദേവ് പ്രസ്താവന പിൻവലിക്കുകയും ചെയ്തിരുന്നു.