ഡല്‍ഹി എയിംസില്‍ ചികിത്സയില്‍ കഴിയുന്ന അധോലോക കുറ്റവാളി ഛോട്ടാ രാജന്‍(61) കോവിഡ് ബാധിച്ച് മരിച്ചതായി പ്രചാരണം. ദേശീയ മാധ്യമങ്ങള്‍ ഉള്‍പ്പെടെ മരണം റിപ്പോര്‍ട്ട് ചെയ്തതോടെ ഇക്കാര്യം നിഷേധിച്ച് എയിംസ് അധികൃതരും മുംബൈ പൊലീസും രംഗത്തെത്തി.
കഴിഞ്ഞ ഏപ്രില്‍ 26നാണ് ഛോട്ടാ രാജനെ എയിംസില്‍ പ്രവേശിപ്പിച്ചത്. വെള്ളിയാഴ്ച വൈകിട്ടോടെയാണ് ചോട്ടാ രാജൻ കോവിഡ് ബാധിച്ച് മരിച്ചതെന്ന് വാർത്ത പുറത്തുവന്നത്. പ്രമുഖ വാർത്താമാധ്യമങ്ങളെല്ലാം റിപ്പോർട്ടും ചെയ്തു.
എന്നാൽ, ഒരു മണിക്കൂർ കഴിഞ്ഞതോടെയാണ് മരണ വാർത്ത നിഷേധിച്ച് എയിംസ് അധികൃതരും ഡൽഹി പൊലീസും രംഗത്തുവന്നത്.
2011ല്‍ മാധ്യമ പ്രവര്‍ത്തകയായ ജ്യോതിര്‍മോയ് ഡേയെ കൊലപ്പെടുത്തിയ കേസില്‍ കുറ്റക്കാരനാണെന്നു കണ്ടെത്തിയതിനെത്തുടർന്ന് ഛോട്ടാ രാജനെ 2018ല്‍ കോടതി ജീവപര്യന്തം തടവിന് ശിക്ഷിച്ചിരുന്നു.
ഇതിനുശേഷമാണ് തിഹാർ ജയിലിലേക്ക് മാറ്റിയത്. ഇന്തോനേഷ്യയിലെ ബാലിയില്‍ നിന്ന് 2015 ല്‍ അറസ്റ്റിലായ രാജേന്ദ്ര നികല്‍ജ എന്ന ഛോട്ടാ രാജന്‍ ഡല്‍ഹിയിലെ തിഹാര്‍ ജയിലില്‍ കാന്ത തടവിലായിരുന്നു.
കൊലപാതകം, കൊള്ള തുടങ്ങിയവയുമായി ബന്ധപ്പെട്ട് മഹാരാഷ്ട്രയില്‍ 70ഓളം ക്രിമിനല്‍ കേസുകളില്‍ പ്രതിയാണ് ഛോട്ടാ രാജന്‍.മുംബൈയില്‍ ഇയാള്‍ക്കെതിരെ നിലനില്‍ക്കുന്ന എല്ലാ കേസുകളും സിബിഐക്ക് കൈമാറിയതിനെത്തുടര്‍ന്ന് ക്രിമിനല്‍ കേസുകള്‍ വിചാരണ ചെയ്യാന്‍ പ്രത്യേക കോടതി രൂപീകരിച്ചിരുന്നു.
.