പിണറായി വിജയൻ സർക്കാരിൻറെ കാലത്ത് കേരളത്തിനുണ്ടായ വ്യവസായ മുന്നേറ്റത്തെ അംഗീകരിച്ച് ലേഖനമെഴുതിയ കോൺഗ്രസ് എംപിയും എഐസിസി വർക്കിങ്‌ കമ്മിറ്റി അംഗവുമായ ശശി തരൂരിനെതിരെ വിമർശനവുമായി കോൺഗ്രസ് മുഖപത്രം വീക്ഷണം. ‘ആരാച്ചാർക്ക്‌ അഹിംസാ അവാർഡോ’ എന്ന തലക്കെട്ടിലെഴുതിയ മുഖപ്രസംഗത്തിൽ തരൂരിന്റെ പേര്‌ പരാമർശിക്കാതെയാണ്‌ വിമർശനം.
ദി ന്യൂ ഇന്ത്യൻ എക്‌സ്‌പ്രസിൽ വെള്ളിയാഴ്‌ച പ്രസിദ്ധീകരിച്ച ‘ചെയ്‌ഞ്ചിങ്‌ കേരള: ലംബറിങ്‌ ജംബോ ടു എ ലൈത് ടൈഗർ’ എന്ന ലേഖനത്തിലാണ്‌ കണക്കുകൾ ഉദ്ധരിച്ച്‌ പിണറായി വിജയൻ സർക്കാരിന്റെ കാലത്തെ വ്യവസായ കുതിച്ചുചാട്ടം തരൂർ വിവരിച്ചത്‌. സ്റ്റാർട്ടപ്പ്‌ രംഗത്തുണ്ടായ അഭൂതപൂർവമായ വളർച്ച, വ്യവസായ അന്തരീക്ഷം അത്യന്തം അനുകൂലമാക്കിയ ‘ഈസ്‌ ഓഫ്‌ ഡൂയിങ്‌ ബിസിനസ്‌’ പട്ടികയിലെ ഒന്നാംസ്ഥാനം, ചുവപ്പുനാട മുറിച്ചുമാറ്റി വ്യവസായ സാഹചര്യമൊരുക്കൽ എന്നിവ തരൂർ ചൂണ്ടിക്കാട്ടി.
ശശി തരൂരിന്റെ നിലപാടിനെതിരെ കോൺഗ്രസ് നേതാക്കൾ രംഗത്തെത്തിയിരുന്നു. ഇതിന്‌ പിന്നാലെ നേതാക്കളെ തള്ളി ലേഖനത്തിൽ ഉറച്ചുതന്നെ നിൽക്കുകയാണെന്ന്‌ തരൂരൂം അറിയിച്ചു. താൻ എഴുതിയ ലേഖനത്തിൽ ഒരു തെറ്റും കാണുന്നില്ലെന്നും വിമർശിക്കുന്നവർ അത് കാണിച്ചു തരട്ടെയെന്നും തരൂർ മാധ്യമങ്ങളോട് പറഞ്ഞു.