കൊച്ചി വാട്ടര്‍ മെട്രോയുടെ ഫോര്‍ട്ട് കൊച്ചി സര്‍വീസ് ഇന്ന് മുതല്‍ ആരംഭിക്കും. ഹൈക്കോടതി ജംക്‌ഷൻ- ഫോർട്ട് കൊച്ചി റൂട്ടുകളിലായാണ് സർവീസ് ആരംഭിക്കുന്നത്. ഗതാഗതക്കുരുക്കില്‍ പെടാതെ ഫോര്‍ട്ട് കൊച്ചിയില്‍ ഏതാണ് ഇത് സഹായകമാകും.
ടെര്‍മിനലിന്റെ എല്ലാ നിര്‍മ്മാണ പ്രവര്‍ത്തനങ്ങളും പൂര്‍ത്തിയായി. 20 മുതല്‍ 30 മിനിറ്റ് ഇടവേളകളില്‍ ഹൈക്കോര്‍ട്ട് ജംഗ്ഷന്‍ – ഫോര്‍ട്ട് കൊച്ചി റൂട്ടില്‍ സര്‍വീസ് നടത്തുവാനാണ് തീരുമാനം. ഹൈക്കോര്‍ട്ട് ജംഗ്ഷന്‍ ടെര്‍മിനലില്‍ നിന്ന് ഫോര്‍ട്ട് കൊച്ചിയിലേക്ക് 40 രൂപയാണ് ടിക്കറ്റ് നിരക്ക്. കൊച്ചിന്‍ ഷിപ്പ്‌യാര്‍ഡ് പതിനാലാമത് ബോട്ട് കഴിഞ്ഞദിവസം കൈമാറിയിരുന്നു. ഈ ബോട്ടിന്റെയും ടിക്കറ്റിംഗ് ഉള്‍പ്പെടെയുള്ള സംവിധാനങ്ങളുടെയും ട്രയല്‍ റണ്‍ പൂര്‍ത്തിയായതോടെയാണ് ഫോര്‍ട്ട് കൊച്ചി ടെര്‍മിനലില്‍ നിന്ന് ഇന്ന് സര്‍വീസ് ആരംഭിക്കുന്നത്.
കഴിഞ്ഞമാസം മുളവുകാട് നോര്‍ത്ത്, സൗത്ത് ചിറ്റൂര്‍, ഏലൂര്‍, ചേരാനല്ലൂര്‍ എന്നീ നാല് ടെര്‍മിനലുകള്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്തിരുന്നു. അവധിക്കാലം ആഘോഷിക്കാന്‍ എത്തുന്ന വിനോദസഞ്ചാരികള്‍ക്ക് ഫോര്‍ട്ട് കൊച്ചിയിലേക്ക് ഗതാഗതക്കുരുക്കില്‍ പെടാതെ എത്തിച്ചേരാന്‍ വാട്ടര്‍ മെട്രോ സര്‍വീസ് സഹായകരമാകും.