കൂറ്റൻ ചരക്ക് കപ്പൽ ബാൾട്ടിമോർ പാലത്തിൽ ഇടിച്ചതിനെ തുടർന്ന് കാണാതായ ആറ് തൊഴിലാളികളും മരിച്ചതായി കരുതുന്നു. ബുധനാഴ്ച രാവിലെ വരെ രക്ഷാപ്രവർത്തനം നിർത്തിവച്ചതായി അധികൃതർ പറയുന്നു. ചൊവ്വാഴ്ചയാണ് ബാൾട്ടിമോറിൽ ഫ്രാൻസിസ് സ്കോട്ട് കീ പാലം തകർന്നത്.
മലയാളിയുടെ ഉടമസ്ഥതയിലുള്ള കമ്പനിയുടെ ചരക്ക് കപ്പലാണ് അപകടത്തിൽപെട്ടത്. ചൊവ്വാഴ്ച പുലർച്ചെ ബാൾട്ടിമോർ ഹാർബറിൽ തകർന്ന ഒരു പാലത്തിൽ നിന്ന് ആറ് തൊഴിലാളികളെ കാണാതായിരുന്നു.
വെള്ളത്തിന്റെ തണുത്ത താപനിലയും പാലം തകർന്നതിനുശേഷം ഇത്ര സമയമായതും അടിസ്ഥാനമാക്കി കാണാതായ ആറുപേരെയും ജീവനോടെ കണ്ടെത്താനുള്ള സാധ്യത കുറവാണെന്ന് യുഎസ് കോസ്റ്റ് ഗാർഡും മേരിലാൻഡ് സ്റ്റേറ്റ് പോലീസ് ഉദ്യോഗസ്ഥരും പറഞ്ഞു.
എന്താണ് സംഭവിച്ചത്?
സിംഗപ്പൂരിൻ്റെ പതാക ഘടിപ്പിച്ച ഡാലി ചരക്ക് കപ്പൽ ബാൾട്ടിമോർ തുറമുഖത്ത് നിന്ന് ശ്രീലങ്കയിലെ കൊളംബോയിലേക്ക് പുറപ്പെടുന്നതിനിടെ, പവർ നഷ്ടപ്പെട്ട് ഫ്രാൻസിസ് സ്കോട്ട് കീ പാലത്തിൻ്റെ തൂണിൽ ഇടിക്കുകയായിരുന്നു. കൂട്ടിയിടി പാലം പടാപ്‌സ്‌കോ നദിയിലേക്ക് തകരാൻ കാരണമായി, ജീവനക്കാരുടെ മെയ്‌ഡേ കോൾ പോലീസിന് ഗതാഗതം നിർത്താൻ മതിയായ സമയം നൽകി.
വെള്ളത്തിനടിയിൽപ്പെട്ട രണ്ടുപേരെ രക്ഷാപ്രവർത്തകർ രക്ഷപ്പെടുത്തി. മറ്റ് ആറ് പേരെ കണ്ടെത്താനായിട്ടില്ല. തകർച്ച സമയത്ത് പാലത്തിൽ ജോലി ചെയ്തിരുന്ന നിർമാണത്തൊഴിലാളികളായിരുന്നു ഇവരെല്ലാം.
ചരക്ക് കപ്പലിൻ്റെ സുരക്ഷാ രേഖയെക്കുറിച്ചും പാലത്തിൻ്റെ നിർമ്മാണത്തെക്കുറിച്ചും രൂപകൽപ്പനയെക്കുറിച്ചും അന്വേഷണം ആരംഭിക്കുമെന്ന് ഫെഡറൽ ട്രാൻസ്‌പോർട്ട് സേഫ്റ്റി ഏജൻസി അറിയിച്ചു. പാലം പുനർനിർമിക്കാൻ കോൺഗ്രസിൽ നിന്ന് ഫണ്ട് തേടുമെന്ന് യുഎസ് പ്രസിഡൻ്റ് ജോ ബൈഡൻ പറഞ്ഞു.
അപകടത്തെ തുടർന്ന് യുഎസിലെ ഏറ്റവും തിരക്കേറിയ സമുദ്ര ടെർമിനലുകളിലൊന്നായ ബാൾട്ടിമോർ തുറമുഖത്തെ എല്ലാ പ്രവർത്തനങ്ങളും താൽക്കാലികമായി നിർത്തിവച്ചു.