വിദേശ രാജ്യങ്ങളിൽ ക്രെഡിറ്റ് കാർഡ് ഉപയോഗിച്ച് പണം ചിലവഴിക്കുന്നത് ഇനിമുതൽ റിസർവ് ബാങ്ക് ഓഫ് ഇന്ത്യയുടെ (ആർബിഐ) ലിബറലൈസ്ഡ് റെമിറ്റൻസ് സ്കീമിന് (എൽആർഎസ്) കീഴിൽ വരുമെന്ന് കേന്ദ്ര ധനമന്ത്രാലയം. എൽആർഎസിന് കീഴിൽ ഇന്ത്യയ്ക്ക് പുറത്തുള്ള അന്താരാഷ്ട്ര ക്രെഡിറ്റ് കാർഡ് ചെലവുകൾ കൊണ്ടുവരുന്ന, ഫോറിൻ എക്സ്ചേഞ്ച് മാനേജ്മെന്റ് ആക്ട് ചട്ടങ്ങൾ ചൊവ്വാഴ്ച രാത്രിയാണ് കേന്ദ്ര സർക്കാർ ഭേദഗതി ചെയ്തത്.
പുതിയ നീക്കത്തിന്റെ ഫലമായി, അന്താരാഷ്ട്ര ക്രെഡിറ്റ് കാർഡുകൾ വഴിയുള്ള ചെലവിന്റെ 20 ശതമാനം ടാക്സ് കളക്റ്റഡ് അറ്റ് സോഴ്സ് (ടിസിഎസ്) ഈടാക്കും. റിസർവ് ബാങ്ക് ഓഫ് ഇന്ത്യയുമായി ചേർന്ന് നടത്തുന്ന ഇത് ജൂലൈ 1 മുതൽ പ്രാബല്യത്തിൽ വരും.
ക്രെഡിറ്റ് കാർഡുകൾ ഉപയോഗിച്ച് വിദേശത്ത് ചെലവഴിക്കുന്നതിനുള്ള മാറ്റങ്ങൾ എന്തൊക്കെയാണ്?
ഇന്ത്യയ്ക്ക് പുറത്ത് ക്രെഡിറ്റ് കാർഡുകൾ ഉപയോഗിച്ച് നടത്തുന്ന ഇടപാടുകൾ എൽആർഎസിന്റെ പരിധിയിൽ ഉടനടി പ്രാബല്യത്തിൽ വരും. ഇത് ജൂലൈ ഒന്ന് മുതൽ 2022-23 ലെ ബജറ്റിൽ പ്രഖ്യാപിച്ചതുപോലെ ടിസിഎസിന്റെ ഉയർന്ന ലെവി പ്രാപ്തമാക്കുന്നു.
നേരത്തെ ഒരു വിദേശ യാത്രയ്ക്കിടെ ചെലവുകൾക്കായി പണമടയ്ക്കാൻ അന്താരാഷ്ട്ര ക്രെഡിറ്റ് കാർഡ് ഉപയോഗിക്കുന്നത് എൽആർഎസ് പരിധിയിൽ ഉൾപ്പെട്ടിരുന്നില്ല. 2000ലെ ഫോറിൻ എക്സ്ചേഞ്ച് മാനേജ്മെന്റ് (കറന്റ് അക്കൗണ്ട് ട്രാൻസാക്ഷൻ) റൂൾസ് റൂൾ ഏഴ് പ്രകാരം അന്താരാഷ്ട്ര ക്രെഡിറ്റ് കാർഡുകൾ വഴിയുള്ള ചെലവുകൾ എൽആർഎസിൽ നിന്ന് ഒഴിവാക്കിയിരുന്നു. ഏറ്റവും പുതിയ വിജ്ഞാപനത്തോടെ, റൂൾ ഏഴ് ഒഴിവാക്കി ഇത്തരം എൽ ആർ എസ് ചെലവുകൾ ഉൾപ്പെടുത്തുന്നതിന് വഴിയൊരുക്കുന്നു.
ഉയർന്ന മൂല്യമുള്ള വിദേശ ഇടപാടുകൾ ട്രാക്ക് ചെയ്യാൻ സഹായിക്കുക എന്നതാണ് ഈ നീക്കത്തിന്റെ ലക്ഷ്യങ്ങളിലൊന്ന്. പത്രങ്ങൾ, മാസികകൾ അല്ലെങ്കിൽ ഓൺലൈനിൽ സബ്‌സ്‌ക്രിപ്‌ഷൻ സേവനങ്ങൾ, സ്ട്രീമിംഗ് സേവനങ്ങൾ പോലുള്ള ഇന്ത്യയിൽ നിന്നുള്ള വിദേശ സാധനങ്ങൾ/സേവനങ്ങൾ വാങ്ങുന്നതിനുള്ള പേയ്‌മെന്റുകളെ മാറ്റങ്ങൾ ബാധിക്കില്ല.
“ഇത് കർശനമായി ഷെഡ്യൂൾ III (എഫ്‌ഇഎം നിയമങ്ങളുടെ) പ്രകാരമുള്ള ഇടപാടുകൾക്കാണ്. അല്ലാതെ വിദേശ സാധനങ്ങൾ/സേവനങ്ങൾ വാങ്ങുന്നതിനുള്ള പേയ്‌മെന്റുകൾക്കല്ല. ആഭ്യന്തര യാത്രാ വ്യവസായത്തിൽ നിന്നാണ് ഈ ആവശ്യം വന്നത്,”ധനമന്ത്രാലയ ഉദ്യോഗസ്ഥൻ പറഞ്ഞു.
വിദേശ യാത്രകളിലെ ചെലവ് വർധിച്ച പശ്ചാത്തലത്തിലാണ് നടപടി. 2022-23 സാമ്പത്തിക വർഷത്തിലെ ഏപ്രിൽ-ഫെബ്രുവരി കാലയളവിൽ ഇന്ത്യക്കാർ 12.51 ബില്യൺ ഡോളർ വിദേശ യാത്രകൾക്കായി ചെലവഴിച്ചു. കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 104 ശതമാനം വർദ്ധനവാണ് ഉണ്ടായത്. കൊവിഡുമായി ബന്ധപ്പെട്ട യാത്രാ നിയന്ത്രണങ്ങൾ കാരണമാണിത്.
ആർബിഐ പുറത്തുവിട്ട ഏറ്റവും പുതിയ ഡാറ്റ പ്രകാരം, 2022 ഏപ്രിൽ-ഫെബ്രുവരി മാസങ്ങളിൽ, അന്താരാഷ്ട്ര രാജ്യങ്ങളിൽ ആഭ്യന്തര യാത്രക്കാർ ചെലവഴിച്ച ആകെ തുക 6.13 ബില്യൺ ഡോളറാണ്.
2022-23 ഏപ്രിൽ-ഫെബ്രുവരി കാലയളവിൽ, ക്രെഡിറ്റ് കാർഡ് ഉപയോഗിച്ചുള്ള ഇടപാടുകൾ മൊത്തത്തിൽ 32.6 ശതമാനം വർധിച്ച് 267.35 കോടിയായി. മൂല്യത്തിന്റെ അടിസ്ഥാനത്തിൽ, 2022-23 ഏപ്രിൽ-ഫെബ്രുവരി കാലയളവിൽ ക്രെഡിറ്റ് കാർഡുകൾ വഴിയുള്ള ചെലവ് ഏകദേശം 50 ശതമാനം വർധിച്ച് 12.95 ലക്ഷം കോടി രൂപയായി.
വിദേശ ടൂർ പാക്കേജുകൾക്കായി ടിസിഎസ് ലെവി ഏർപ്പെടുത്താനുള്ള ഗവൺമെന്റിന്റെ മുൻകാല നടപടികൾക്ക് പിന്നാലെയാണ് ക്രെഡിറ്റ് കാർഡുകൾക്കുള്ള നടപടികൾ. 2020 ഫെബ്രുവരിയിൽ, ആദായനികുതി നിയമത്തിലെ സെക്ഷൻ 206 സി പ്രകാരം വിദേശ പണമയക്കുന്നതിനും വിദേശ ടൂർ പാക്കേജിന്റെയും അഞ്ച് ശതമാനം ടിസിഎസ് ഈടാക്കുന്നതിന് പുതിയ വ്യവസ്ഥ ഉൾപ്പെടുത്തുന്നതായി സർക്കാർ ബജറ്റിൽ പ്രഖ്യാപിച്ചിരുന്നു. 2020 ഒക്ടോബർ മുതൽ ഇത് പ്രാബല്യത്തിൽ വന്നു.
അന്താരാഷ്ട്ര ക്രെഡിറ്റ് കാർഡ് ഇടപാടുകൾക്കുള്ള നികുതി ലെവി എന്താണ്?
സാങ്കേതികമായി, ജൂലൈ ഒന്ന് വരെ (മെഡിക്കൽ, വിദ്യാഭ്യാസവുമായി ബന്ധപ്പെട്ട മേഖലകൾ ഒഴികെ) അത്തരം ഇടപാടുകൾക്ക് അഞ്ച് ശതമാനം ടിസിഎസ് ലെവിയാണ് പ്രാബല്യത്തിൽ വരുന്നത്. ജൂലൈ ഒന്നിന് ശേഷം ഇത് 20 ശതമാനമായി വർദ്ധിക്കും. എന്നിരുന്നാലും, വിദേശ ക്രെഡിറ്റ് കാർഡ് ചെലവുകൾക്കുള്ള ലെവി ടിസിഎസ് ഇപ്പോൾ പ്രവർത്തനക്ഷമമാക്കിയിട്ടില്ലെന്ന് രംഗത്തെ വൃത്തങ്ങൾ പറയുന്നു.
2023-24 ലെ ബജറ്റിൽ വിദേശത്തേക്ക് പണമയയ്‌ക്കാനുള്ള ടിസിഎസിന്റെ പരിധിയിൽ സർക്കാർ മാറ്റം വരുത്തിയിരുന്നു. വിദ്യാഭ്യാസത്തിനും മെഡിക്കൽ ആവശ്യങ്ങൾക്കുമല്ലാതെ എൽആർഎസ് പ്രകാരം വിദേശത്തേക്ക് അയക്കുന്ന പണത്തിന് 2023 ജൂലൈ ഒന്ന് മുതൽ 20 ശതമാനം ടിസിഎസ് ബാധകമാകുമെന്ന് ബജറ്റിൽ വ്യക്തമാക്കിയിരുന്നു. ഈ നിർദ്ദേശത്തിന് മുൻപ് ഏഴ് ലക്ഷം രൂപയ്ക്ക് മുകളിൽ വിദേശത്തെക്ക് പണം അയയ്ക്കുന്നതിൽ അഞ്ച് ശതമാനവും പരിധിയില്ലാതെ വിദേശ ടൂർ പാക്കേജിന് അഞ്ച് ശതമാനവും ടിസിഎസ് ബാധകമായിരുന്നു.
മാർച്ചിൽ, ധനകാര്യ ബിൽ 2023 ലോക്‌സഭയുടെ പരിഗണനയ്‌ക്കും പാസാക്കുന്നതിനുമായി നീക്കുന്നതിനിടെ, വിദേശ യാത്രകളിലെ ക്രെഡിറ്റ് കാർഡ് പേയ്‌മെന്റുകൾ എൽആർഎസിന് കീഴിൽ കൊണ്ടുവരുന്നതിനുള്ള മാർഗ്ഗങ്ങൾ പരിശോധിക്കാൻ റിസർവ് ബാങ്കിനോട് ആവശ്യപ്പെട്ടിട്ടുണ്ടെന്ന് ധനമന്ത്രി നിർമ്മല സീതാരാമൻ പറഞ്ഞിരുന്നു.
എൽആർഎസ് സ്കീമിന് കീഴിൽ ആർബിഐയുടെ അനുമതിയില്ലാതെ ഒരു വർഷം പരമാവധി രണ്ടര ലക്ഷം ഡോളർ വരെയാണ് ചിലവഴിക്കാനാകുക. ക്രെഡിറ്റ് കാർഡ് ചെലവുകളെക്കുറിച്ചുള്ള മറ്റ് മാർഗ്ഗനിർദ്ദേശങ്ങൾ പിന്നീട് നൽകുമെന്ന് പ്രതീക്ഷിക്കുന്നു.
പുതിയ നിയമങ്ങളെക്കുറിച്ച് വിദഗ്ധർ എന്താണ് പറയുന്നത്?
ക്രെഡിറ്റ് കാർഡ് ചെലവിലെ മാറ്റങ്ങൾ ബാങ്കുകളുടെയും ധനകാര്യ സ്ഥാപനങ്ങളുടെയും ഭാരം വർദ്ധിപ്പിക്കുമെന്ന് പ്രതീക്ഷിക്കുന്നതായി വിദഗ്ധർ പറഞ്ഞു. വിദേശ ഇടപാടുകൾ ട്രാക്ക് ചെയ്യുന്നതിനാണ് ഇത് ഉദ്ദേശിക്കുന്നതെങ്കിൽ, ടിസിഎസ് നിരക്കായി 20 ശതമാനം എന്നത് കൂടുതലാണെന്നും അവർ ചൂണ്ടിക്കാട്ടി.
അന്താരാഷ്ട്ര ക്രെഡിറ്റ് കാർഡ് ഇടപാടുകളെ ചട്ടം 5-ന് കീഴിലുള്ള നിയന്ത്രണങ്ങളുടെ പരിധിയിൽ നിന്ന് ഒഴിവാക്കുന്നതിനുള്ള നടപടിയായി ഏകദേശം 20 വർഷം മുൻപാണ് റൂൾ ഏഴ് അവതരിപ്പിച്ചതെന്ന്, നംഗിയ ആൻഡേഴ്സൺ ഇന്ത്യ, പാർട്ണർ-റെഗുലേറ്ററി, നിശ്ചൽ എസ് അറോറ പറഞ്ഞു. അതായത്, ഷെഡ്യൂൾ III മുതൽ കറന്റ് അക്കൗണ്ട് ട്രാൻസാക്ഷൻ റൂൾസ്, 2000-ൽ ഉൾപ്പെടുത്തിയിട്ടുള്ള ഇടപാടുകളിൽ ആർബിഐയുടെ മുൻകൂർ അനുമതി ആവശ്യമാണ്.
“അതിനാൽ, ഇന്ത്യക്ക് പുറത്തുള്ള സന്ദർശനത്തിലോ ഇൻറർനെറ്റിലെ അന്താരാഷ്ട്ര പർച്ചേസുകളിലോ ഇന്ത്യയിലുള്ളവർ അന്താരാഷ്ട്ര ക്രെഡിറ്റ് കാർഡുകൾ ഉപയോഗിക്കുന്നത്, ഒരു സാമ്പത്തിക വർഷത്തിൽ ഒരാൾക്ക് 250,000 ഡോളർ എന്ന മൊത്തത്തിലുള്ള എൽആർഎസ് പരിധി കണക്കാക്കുമ്പോൾ ഉൾപ്പെടുത്താൻ പറ്റില്ലായിരുന്നു. എൽആർഎസിനു കീഴിലുള്ള 250,000 യുഎസ് ഡോളറിന്റെ പരിധി നിശ്ചയിക്കുന്നതിന് അന്താരാഷ്ട്ര ക്രെഡിറ്റ് കാർഡ് ഇടപാടുകളും പരിഗണിക്കപ്പെടുന്നുവെന്ന് ഇപ്പോൾ ഉറപ്പാക്കുന്നു,” നിശ്ചൽ പറഞ്ഞു.
ക്രെഡിറ്റ് കാർഡ് ഉപഭോക്താക്കൾക്ക് വിദേശത്തേക്ക് യാത്ര ചെയ്യുന്നതിനോ വിദേശത്ത് പണമിടപാടുകൾ നടത്തുന്നതിനോ അഞ്ച് ശതമാനം ടിസിഎസ് ചാർജ് അധിക ബാധ്യതയാകും. അതായത് ഇൻവോയ്സ് മൂല്യം 100 ആണെങ്കിൽ, ഉപഭോക്താവിന്റെ പക്കൽനിന്നു 105 കുറയ്ക്കും. ജൂലായ് ഒന്നിന് ശേഷം ഇത് 20 ശതമാനം ആയി ഉയരും,”സുപ്രീം കോടതി അഭിഭാഷകൻ ദീപക് ജോഷി പറഞ്ഞു.