പോപ്പുലര്‍ ഫ്രണ്ട് ഓഫ് ഇന്ത്യയ്ക്കെതിരെ (പിഎഫ്ഐ), ദേശീയ അന്വേഷണ ഏജന്‍സിയും (എന്‍ഐഎ) എന്‍ഫോഴ്സ്മെന്റ് ഡയറക്ടറേറ്റും (ഇഡി) നടത്തുന്ന റെയ്ഡ് പരുരോഗമിക്കുന്നു. ആന്ധ്രാപ്രദേശ്, തെലങ്കാന, ഉത്തര്‍പ്രദേശ്, കേരളം, കര്‍ണാടക, തമിഴ്നാട് എന്നീ സംസ്ഥാനങ്ങളിലെ വിവിധ ഇടങ്ങളില്‍ സംഘം പരിശോധന നടത്തി. വിവിധ കേസുകളിലായി നൂറിലധികം പിഎഫ്ഐ അംഗങ്ങളെയും അവരുമായി ബന്ധമുള്ളവരെയും ഇഡിയും എന്‍ഐഎയും സംസ്ഥാന പോലീസും ചേര്‍ന്ന് അറസ്റ്റ് ചെയ്തിട്ടുണ്ട്. പത്തിലധികം സംസ്ഥാനങ്ങളില്‍ നിന്നാണ് അറസ്റ്റ് നടന്നത്.
പിഎഫ്‌ഐക്കെതിരെ അന്വേഷണ ഏജന്‍സി നടത്തുന്ന ഏറ്റവും വലിയ നടപടിയാണിത്.തീവ്രവാദത്തിന് ധനസഹായം നല്‍കല്‍, പരിശീലന ക്യാമ്പുകള്‍ സംഘടിപ്പിക്കല്‍, നിരോധിത സംഘടനകളില്‍ ചേരാന്‍ ആളുകളെ പ്രേരിപ്പിക്കുന്ന എന്നിവയില്‍ ഏര്‍പ്പെട്ടിട്ടുളള ആളുകളുടെ താമസസ്ഥലത്തും ഔദ്യോഗിക വസതികളിലും തിരച്ചില്‍ നടക്കുകയാണ്. 200ലധികം എന്‍ഐഎ ഉദ്യോഗസ്ഥരുള്‍പ്പെട്ട സംഘമാണ് തിരച്ചില്‍ നടത്തുന്നത്.മലപ്പുറം ജില്ലയിലെ മഞ്ചേരിയിലെ പിഎഫ്ഐ ചെയര്‍മാന്‍ ഒഎംഎ സലാമിന്റെ വീടുള്‍പ്പെടെ പിഎഫ്ഐ നേതാക്കളുടെ വീടുകളിലും പിഎഫ്ഐ ഓഫീസുകളിലും അര്‍ധരാത്രി മുതല്‍ എന്‍ഐഎയും ഇഡിയും റെയ്ഡ് നടത്തുന്നതായി എഎന്‍ഐ റിപ്പോര്‍ട്ട് ചെയ്യുന്നു. റെയ്ഡ് നടക്കുന്നതിനിടെ ഒഎംഎ സലാമിന്റെ മലപ്പുറത്തെ വീടിന് മുന്നില്‍ പിഎഫ്ഐ പ്രവര്‍ത്തകര്‍ പ്രതിഷേധ പ്രകടനം നടത്തി.
കേരളത്തിലും തമിഴ്നാട്ടിലും എന്‍ഐഎ റെയ്ഡ്
കേരളത്തിലെ പിഎഫ്‌ഐയുടെ വിവിധ ഓഫീസുകളില്‍ എന്‍ഐഎയും ഇഡിയും റെയ്ഡ് നടത്തി. നേതാക്കളുടെ വീടുള്‍പ്പെടെ 50 ഓളം സ്ഥലങ്ങളില്‍ റെയ്ഡ് നടക്കുന്നുണ്ടെന്ന് പിഎഫ്ഐ സംസ്ഥാന ജനറല്‍ സെക്രട്ടറി എ അബ്ദുള്‍ സത്താര്‍ പറഞ്ഞു.സംസ്ഥാനത്തെ ജനകീയ നേതാക്കളുടെ വീടുകളില്‍ കേന്ദ്ര ഏജന്‍സികളായ എന്‍ഐഎയും ഇഡിയും അര്‍ധരാത്രി നടത്തിയ റെയ്ഡാണ് അതിക്രമങ്ങളുടെ ഒടുവിലത്തെ ഉദാഹരണം. ദേശീയ, സംസ്ഥാന, പ്രാദേശിക തല നേതാക്കളുടെ വീടുകളില്‍ റെയ്ഡ് നടക്കുന്നു. സംസ്ഥാന കമ്മിറ്റി ഓഫീസും റെയ്ഡ് ചെയ്യപ്പെടുന്നു. വിയോജിപ്പുള്ള ശബ്ദങ്ങളെ നിശബ്ദമാക്കാന്‍ ഏജന്‍സികളെ ഉപയോഗിക്കാനുള്ള ഫാസിസ്റ്റ് ഭരണകൂടത്തിന്റെ നീക്കങ്ങളില്‍ ശക്തമായി പ്രതിഷേധിക്കുന്നതായും അദ്ദേഹം കൂട്ടിച്ചേര്‍ത്തു.
മധുര, തേനി, ഡിണ്ടിഗല്‍, രാമനാഥപുരം, കടലൂര്‍, തിരുനെല്‍വേലി, തെങ്കാശി എന്നിവിടങ്ങളിലെ വിവിധ സ്ഥലങ്ങളില്‍ എന്‍ഐഎ ഉദ്യോഗസ്ഥര്‍ റെയ്ഡ് ആരംഭിച്ചിട്ടുണ്ട്. പിഎഫ്‌ഐയുടെ കടലൂര്‍ ജില്ലാ തലവന്‍ പ്യാസ് അഹമ്മദ്, മധുരൈ ജില്ലാ സെക്രട്ടറി യാസര്‍ അറാഫത്ത് എന്നിവരെ എന്‍ഐഎ ചോദ്യം ചെയ്യുന്നുണ്ട്. പിഎഫ്‌ഐയുമായി ബന്ധപ്പെട്ട് കഴിഞ്ഞ ദിവസങ്ങളില്‍ എന്‍ഐഎ പത്തിലധികം കേസുകളാണ് രജിസ്റ്റര്‍ ചെയ്തത്. 100 ലധികം സ്ഥലങ്ങളില്‍ ഇതിനോടകം എന്‍ ഐ എ റെയ്ഡ് നടത്തിയിട്ടുണ്ട്.