രാജ്യത്തിന്റെ ആത്മഹത്യ ക്യാപിറ്റലായി കൊല്ലം

രാജ്യത്ത് ഏറ്റവും കൂടുതൽ ആത്മഹത്യ നടക്കുന്നയിടം നമ്മുടെ കേരളത്തിൽ. 2021ൽ ഇന്ത്യയിൽ ഏറ്റവും കൂടുതൽ ആത്മഹത്യാ നിരക്ക് കൊല്ലം നഗരത്തിലെന്നുള്ള കണക്കുകളാണ് പുറത്തു വന്നിരിക്കുന്നത്. കഴിഞ്ഞ വർഷം ലക്ഷത്തിൽ 12 പേർ രാജ്യത്ത് ആത്മഹത്യ ചെയ്‌തതായാണ് കണക്കുകൾ സൂചിപ്പിക്കുന്നത്. എന്നാൽ കൊല്ലം നഗരത്തിൽ 43 പേരാണ് ആത്മഹത്യ ചെയ്‌തതിരിക്കുന്നത്. ജനസംഖ്യയിൽ ഒരു ലക്ഷം പേരിൽ എത്ര പേർ ആത്മഹത്യ ചെയ്യുന്നു എന്ന കണക്കാണ് ആത്മഹത്യാ നിരക്ക് കണക്കാക്കാൻ ഉപയോഗിക്കുനന്ത്. നാഷണൽ ക്രെെം റെക്കോ‌ഡ് ബ്യൂറോയുടെ റിപ്പോർട്ടിലാണ് ഇക്കാര്യങ്ങൾ വ്യക്തമാക്കുന്നത്. കുടുംബപരമായ വിഷയങ്ങളാണ് ആത്മഹത്യയ്ക്ക് പ്രധാന കാരണമെന്നും റിപ്പോർട്ടിൽ വ്യക്തമാക്കുന്നുണ്ട്.

38.5 ആത്മഹത്യാ നിരക്കുമായി പശ്ചിമ ബംഗാളിലെ അസൻസോൾ നഗരമാണ് രണ്ടാമതുള്ളത്. കൊല്ലം നഗരത്തിലെജനസംഖ്യാ നിരക്ക് 11.1 ലക്ഷമാണ്. 2021ൽ 487 ആത്മഹത്യകളാണ് ഇവിടെ റിപ്പോർട്ട് ചെയ്യപ്പെട്ടത്. 43.9 ആയിരുന്നു കൊല്ലം നഗരത്തിലെ കഴിഞ്ഞ വർഷത്തെ ആത്മഹത്യാ നിരക്ക് രാജ്യത്ത് ആകമാനം 1,64,033 പേരാണ് 2021ൽ ആത്മഹത്യ ചെയ്തത്. 2020ൽ ഇന്ത്യയിൽ ആത്മഹത്യ ചെയ്‌തവർ 1,53,052 ആയിരുന്നു. അതേസമയം 9549 പേരാണ് കഴിഞ്ഞ വർഷം കേരളത്തിൽ ആത്മഹത്യ ചെയ്തത്. സംസ്ഥാനങ്ങളുടെ കണക്കിൽ മഹാരാഷ്‌ട്രയാണ് ഏറ്റവും മുന്നിൽ. 22,207 പേർ ഇവിടെ കഴിഞ്ഞ വർഷം ആത്മഹത്യ ചെയ്‌തു.

ഇതിനിടയിൽ മറ്റൊരു ഞെട്ടിക്കുന്ന വിവരം കൂടി ഈ റിപ്പോർട്ടിലൂടെ പുറത്തു വരുന്നുണ്ട്. കേരളത്തിൽ കൂട്ടആത്മഹത്യകളുടെ എണ്ണവും വർദ്ധിക്കുന്നുവെന്നുള്ള കണക്കുകളാണ് ഇപ്പോൾ പുറത്തു വന്നിരിക്കുന്നത്. 12 കൂട്ട ആത്മഹത്യകളാണ് കേരളത്തിൽ കഴിഞ്ഞ വർഷം സംഭവിച്ചത്. 26 പേർ മരണപ്പെട്ടു. കൂട്ടആത്മഹത്യകളുടെ കാര്യത്തിൽ നാലാമതാണ് കേരളം. അതേസമയം കൂട്ട ആത്മഹത്യയിൽ ഒന്നാം സ്ഥാനത്തുള്ള തമിഴ്‌നാട്ടിൽ 33 കൂട്ടആത്മഹത്യകളാണ് 2021ൽ നടന്നത്.

കൊല്ലത്തെ നടുക്കിയ ആത്മഹത്യകളിൽ ശ്രദ്ധേയമായതായിരഒുന്നു വിസ്മയയുടേത്. 2021 ജൂൺ 21 നാണ് ബിഎഎംഎസ് വിദ്യാർത്ഥിനി വിസ്മയയെ ഭർതൃവീട്ടിൽ മരിച്ച നിലയിൽ കണ്ടെത്തിയത്. 2020 മേയ് 30-നാണ് ബിഎഎംഎസ് വിദ്യാർഥിനിയായിരുന്ന വിസ്മയയെ മോട്ടോർവാഹനവകുപ്പിൽ എഎംവിഐ ആയിരുന്ന കിരൺ കുമാർ വിവാഹം കഴിച്ചത്. തുടർന്ന് ഭർത്താവ് ശാരീരികമായും മാനസികമായും പീഡിപ്പിച്ചതിനെ തുടർന്നാണ് വിസ്മയ ആത്മഹത്യ ചെയ്‌തത്. സ്ത്രീധനമായി നൽകിയ കാറിൽ തൃപ്തനല്ലാത്തതിനാലും വാഗ്ദാനം ചെയ്ത സ്വർണം ലഭിച്ചില്ലെന്നും പറഞ്ഞ് വിസ്മയയെ ക്രൂരമായ പീഡനത്തിന് ഇരയാക്കുകയായിരുന്നു. സ്ത്രീധന പീഡനം, ആത്മഹത്യാ പ്രേരണ, പരിക്കേൽപ്പിക്കൽ, ഭീഷണിപ്പെടുത്തൽ, സ്ത്രീധനം ആവശ്യപ്പെടൽ എന്നീ കുറ്റകൃത്യങ്ങൾ കിരൺ കുമാർ ചെയ്‌തെന്നാണ് പ്രോസിക്യൂഷൻ ആരോപണം. കേസിൽ ഭർത്താവ് എസ്.കിരൺകുമാറിന് 25 വർഷം കഠിന തടവും 12.55 ലക്ഷം രൂപ പിഴയും വിധിച്ചിരുന്നു.

കിഴക്കേകല്ലടയിൽ ഭർതൃവീട്ടിലെ പീഡനം കാരണം എഴുകോൺ കടയ്ക്കോട് സ്വദേശി സുവ്യ എ എസ് ആത്മഹത്യ ചെയ്തത് 2022 ഏപ്രിലിലാണ്. സുവ്യയെ ഭർതൃവീട്ടിൽ തൂങ്ങിമരിച്ച നിലയിൽ കണ്ടെത്തുകയായിരുന്നു. ഭർത്താവിൻറെ അമ്മയും സുവ്യയും തമ്മിൽ വാക്കുതർക്കമുണ്ടായതിനു പിന്നാലെയാണ് ആത്മഹത്യ നടന്നത്. ഇതിന് പിന്നാലെ മുറിയിൽ കയറി സുവ്യ വാതിലടയ്ക്കുകയായിരുന്നു. ഏറെ നേരം കഴിഞ്ഞിട്ടും പുറത്തുവരാതായതോടെ അന്വേഷിച്ചപ്പോഴാണ് സുവ്യയെ തൂങ്ങിമരിച്ച നിലിയൽ കണ്ടെത്തിയത്. അതിനിടെ ഭർത്താവിൻറെ വീട്ടിൽ താൻ അനുഭവിക്കുന്ന പീഡനം സുവ്യ വിവരിക്കുന്ന ശബ്ദരേഖ പുറത്തുവന്നിരുന്നു. ഭർതൃമാതാവ് ക്രൂരമായി പീഡിപ്പിക്കുന്നതായി ഓഡിയോയിൽ പറയുന്നുണ്ട്. ഭർത്താവിൻറെ അമ്മയിൽ നിന്ന് മാനസിക പീഡനമുണ്ട്. വീട്ടിൽ നിന്ന് ഇറങ്ങി പോവാൻ നിരന്തരം അമ്മായി അമ്മ ആവശ്യപ്പെടുകയാണ്. എന്നാൽ ഭർത്താവ് ഇതിനെതിരെ ഒരക്ഷരം പോലും മിണ്ടാറില്ലെന്നും സുവ്യ ഓഡിയോയിൽ വ്യക്തമാക്കുന്നു. ഭർത്താവിനും ഭർത്താവിൻറെ അമ്മയ്ക്കുമെതിരെ പൊലീസ് ആത്മഹത്യ പ്രേരണാകുറ്റമാണ് ചുമത്തിയത്.

2021 ജൂലെെയിലാണ് കിഴക്കേകല്ലട നിലമേൽ സൈജു ഭവനിൽ സൈജുവിൻ്റെ ഭാര്യ രേവതി കൃഷ്ണൻ (22) ആത്മഹത്യ ചെയ്തത്. ശാസ്താംകോട്ടയ്ക്ക് സമീപത്തെ കടപുഴ പാലത്തിൽ നിന്ന് കല്ലടയാറ്റിലേക്ക് ചാടി ജീവനൊടുക്കുകയായിരുന്നു. യുവതി പാലത്തിൽ നിന്ന് ആറ്റിലേക്ക് ചാടുന്നത് പരിസരത്തുള്ളവർ കണ്ടിരുന്നു. പാലത്തിന് സമീപം വാഹന പരിശോധന നടത്തുകയായിരുന്ന കിഴക്കേകല്ലട പോലീസ് സംഘം ഉടൻ തന്നെ ഓടിയെത്തി. പോലീസ് ഉദ്യോഗസ്ഥർ വള്ളമിറക്കി യുവതിയെ കണ്ടെത്തി കരയിലെത്തിച്ച് ശാസ്താംകോട്ടയിലെ സ്വകാര്യ ആശുപത്രിയിലേക്ക് മാറ്റിയെങ്കിലും ജീവൻ രക്ഷിക്കാനായില്ല.

ഓടനാവട്ടം മുട്ടറയിൽ വിവാഹനിശ്ചയം കഴിഞ്ഞ യുവതി ആത്മഹത്യ ചെയ്തത് 2022 ഏപ്രിൽ മാസത്തിലാണ്. സംഭവത്തിൽ പ്രതിശ്രുത വരനെ പൊലീസ് അറസ്റ്റ് ചെയ്തിരുന്നു. രഏപ്രിൽ 27ന് വീട്ടിനുള്ളിലെ കിടപ്പുമുറിയിലാണ് സന്ധ്യ തൂങ്ങിമരിച്ചത്. സന്ധ്യയുമായി പ്രണയത്തിലായിരുന്ന അനീഷാണു തിടുക്കത്തിൽ വിവാഹത്തിന് താൽപര്യമെടുത്തത്.ആറു മാസം കഴിഞ്ഞു വിവാഹം നടത്താൻ പിന്നീട് ഇരുവീട്ടുകാരും നിശ്ചയിച്ചു. പക്ഷേ സ്ത്രീധനമായി ഒന്നും വേണ്ടെന്ന് പറഞ്ഞിരുന്ന അനീഷ് നിശ്ചയത്തിനുശേഷം വില്ലനായി. സ്ത്രീധനവും ബൈക്കും വേണമെന്നാവശ്യപ്പെട്ടു നിരന്തരം സന്ധ്യയോടു വഴക്കായി. മൊബൈൽ ഫോണിലൂടെ സന്ധ്യ മരിക്കുന്നതിനു മുൻപും ഇരുവരും തമ്മിൽ തർക്കമുണ്ടായെന്നും പൊലീസ് വ്യക്തമാക്കിയിരുന്നു.

(ബന്ധപ്പെടാനുള്ള ഹെൽപ്പ് ലൈൻ നമ്പർ– DISHA – 1056, 0471-2552056; State’s health helpline 104; Maithri – 0484-2540530; Thanal Suicide Prevention Centre – 0495-2760000)