മകരവിളക്ക് ഉൽസവത്തിന്റെ ഭാഗമായി ശബരിമല നട നാളെ തുറക്കും. ജനുവരി 14ആം തീയതിയാണ് മകരവിളക്ക്. മണ്ഡലകാല തീർഥാടനം കഴിഞ്ഞ് 3 ദിവസങ്ങൾക്ക് ശേഷമാണ് ഇപ്പോൾ വീണ്ടും ശബരിമല നട മകരവിളക്ക് ഉൽസവത്തിനായി തുറക്കുന്നത്.
അതേസമയം മറ്റന്നാൾ മുതൽ കരിമല വഴി തീർഥാടകർക്ക് പ്രവേശനം അനുവദിക്കുമെന്നും അധികൃതർ വ്യക്തമാക്കി. നട തുറക്കുന്ന നാളെ ഭക്തർക്ക് പ്രവേശനമുണ്ടാവില്ല. വെള്ളിയാഴ്ച പുലർച്ചെ നാല് മണി മുതലാണ് തീർഥാടകരെ കടത്തി വിടുക.
മകര വിളക്ക് കണക്കിലെടുത്ത് കനത്ത സുരക്ഷ ക്രമീകരണങ്ങളാണ് പമ്പ, നിലയ്ക്കൽ, എരുമേലി, സന്നിധാനം എന്നിവിടങ്ങളിൽ ഏർപ്പെടുത്തിയിരിക്കുന്നത്. നാളെ വൈകിട്ട് അഞ്ച് മണിക്ക് കണ്ഠരര് മഹേഷ് മോഹനരുടെ മുഖ്യ കാർമികത്വത്തിൽ മേൽശാന്തി എൻ പരമേശ്വരൻ നമ്പൂതിരി ശ്രീകോവിൽ തുറന്ന് ദീപം തെളിക്കും. മണ്ഡലകാല തീർഥാടനത്തിന്റെ ഭാഗമായി 11 ലക്ഷം തീർഥാടകരാണ് ശബരിമലയിൽ ദർശനത്തിനായി എത്തിയതെന്ന് ദേവസ്വം ബോർഡ് വ്യക്തമാക്കി.