ഇന്ത്യയിലെ ഓണ്‍ലൈന്‍ നൈപുണ്യ അധിഷ്ഠിത ഗെയിമിംഗ് വ്യവസായത്തിലെ മുന്‍നിരക്കാരായ സൂപ്പി, സീരിസ് ബി ഫണ്ടിംഗ് അവസാനിപ്പിക്കുന്നു. സീരിസ് ബി ഫണ്ടിംഗ് റൗണ്ടില്‍ 500 മില്യണ്‍ ഡോളറിന്റെ പ്രീമണി വാല്യുവേഷനില്‍ 30 മില്യണ്‍ ഡോളര്‍ സമാഹരിച്ചതായി കമ്പനി അറിയിച്ചു. സിലിക്കണ്‍ വാലി ആസ്ഥാനമായുള്ള വെസ്റ്റ് ക്യാപ് ഗ്രൂപ്പും ടോമാല്‍സ് ബേ ക്യാപിറ്റലും ചേര്‍ന്നാണ് സീരിസ് ബി ഫണ്ടിംഗ് റൗണ്ടിന് നേതൃത്വം നല്‍കിയത്. മാട്രിക്സ് പാര്‍ട്ണേഴ്സ് ഇന്ത്യയും ഓറിയോസ് വെഞ്ച്വര്‍ പാര്‍ട്ണേഴ്സും ഈ റൗണ്ടില്‍ പങ്കെടുത്തിരുന്നു.
100 ദശലക്ഷം ഡോളര്‍ മൂല്യമുള്ള സീരിസ് എ റൗണ്ട് കഴിഞ്ഞ് ആറ് മാസത്തിനുള്ളിലാണ് ബി റൗണ്ട് നടന്നത്. ബി റൗണ്ട് ഫണ്ടിംഗ് പൂര്‍ത്തിയായതോടെ സൂപ്പിയുടെ മൂല്യത്തില്‍ അഞ്ച് മടങ്ങ് വര്‍ദ്ധനവുണ്ടായെന്ന് അധികൃതര്‍ അറിയിച്ചു. ആകെ 49 മില്യണ്‍ ഡോളറിന്റെ നിക്ഷേപമാണ് സൂപ്പി സമാഹരിച്ചത്. ഇതോടെ ഈ മേഖലയിലെ മുന്‍നിരക്കാരായ വെസ്റ്റ്ക്യാപ് ഗ്രൂപ്പ്, മാട്രിക്സ് പാര്‍ട്ണേഴ്സ് ഇന്ത്യ, സ്മൈല്‍ ഗ്രൂപ്പ്, ഓറിയോസ് പാര്‍ട്ണേഴ്സ് എന്നിവരുടെ ശക്തമായ പിന്തുണയും സൂപ്പിക്ക് കൈവന്നു. കമ്പനിക്ക് നിലവില്‍ 10 ദശലക്ഷത്തിലധികം ഉപയോക്താക്കളുടെ അടിത്തറയുണ്ട്. ഉല്‍പ്പന്നനിരയുടെ വിപുലീകരണത്തിനും വിപണി വ്യാപ്തി വര്‍ദ്ധിപ്പിക്കാനും പ്രതിഭാധനരായ ഉദ്യോഗസ്ഥരെ നിയമിക്കാനും പുതിയ നിക്ഷേപം ഉപയോഗിക്കുമെന്നും സൂപ്പി അറിയിച്ചു.
ഐഐടി കാണ്‍പൂരില്‍ നിന്നുള്ള ബിരുദധാരികളായ ദില്‍ഷേര്‍ സിംഗ്, സിദ്ധാന്ത് സൗരഭ് എന്നിവര്‍ ചേര്‍ന്ന് 2018ലാണ് സൂപ്പി രൂപീകരിച്ചത്. സ്മൈല്‍ ഗ്രൂപ്പിന്റെ ഫണ്ടിംഗിലാണ് കമ്പനി പ്രാഥമിക വളര്‍ച്ച കൈവരിച്ചത്. നിലവില്‍ സൂപ്പിയുടെ പോര്‍ട്ട്ഫോളിയോയില്‍ ഒന്നിലധികം ജനപ്രിയ ബോര്‍ഡ് ഗെയിമുകളുടെ നൂതന ഗെയിമിംഗ് ഫോര്‍മാറ്റുകള്‍ അണിനിരക്കുന്നു. ഈ മുന്‍നിര ഗെയിമിംഗ് ആപ്പ് തത്സമയ ട്രിവിയ ക്വിസ് ടൂര്‍ണമെന്റുകള്‍ ഹോസ്റ്റു ചെയ്യുകയും 250 ദശലക്ഷത്തിലധികം ഗെയിംപ്ലേകള്‍ കാണുകയും ചെയ്തിട്ടുണ്ട്.