കോളേജ് ഹോസ്റ്റലിൽ വെച്ച് സീനിയർ വിദ്യാർത്ഥികൾ വിദ്യാർത്ഥിയെ ക്രൂരമായി റാഗ് ചെയ്തതിൻ്റെ ദൃശ്യം പുറത്ത്. ബെൽറ്റ് കൊണ്ട് അടിക്കുന്നതിൻ്റെയും ചവിട്ടുന്നതിൻ്റെയും മുഖത്തടിക്കുന്നതിൻ്റെയും ദൃശ്യമാണ് പുറത്ത് വന്നത്. വിദ്യാർത്ഥി പരാതി നൽകിയതിനെ തുടർന്ന് മൂന്ന് വിദ്യാർത്ഥികളെ ക്യാമ്പസിൽ നിന്ന് പുറത്താക്കി. പോലീസ് ഇവരെ അറസ്റ്റ് ചെയ്തു.
ഹിമാചൽ പ്രദേശിലെ സോളനിലെ സ്വകാര്യ സർവകലാശാലയായ ബഹ്‌റ യൂണിവേഴ്‌സിറ്റിയിൽ സെപ്തംബർ 7ന് രാത്രിയാണ് സംഭവം. സീനിയേഴ്സ് വിളിച്ചപ്പോൾ കൂടെ ചെല്ലാൻ തയ്യാറാകാതിരുന്ന വിദ്യാർത്ഥിയെ വലിച്ചിഴച്ച് മുറിയിൽ നിന്ന് കൊണ്ടുപോവുകയായിരുന്നു. അഞ്ചോ ആറോ വിദ്യാർത്ഥികൾ ഒരു മുറിയിൽ ഒത്തുകൂടിയിരിക്കുന്നത് വീഡിയോയിൽ കാണാം. കുട്ടിയെ മദ്യം കുടിക്കാൻ നിർബന്ധിച്ചു. വിസമ്മതിച്ചപ്പോഴായിരുന്നു ക്രൂരമർദ്ദനം. മൂന്ന് പേരാണ് വിദ്യാർത്ഥിയെ കസേരയിൽ ഇരുത്തി മർദിക്കുകയും ബെൽറ്റൂരി അടിക്കുകയും ചെയ്തത്. വേറെ ചിലർ എല്ലാം കണ്ട് മുറിയിൽ കട്ടിലിൽ കിടക്കുന്നതും കാണാം.
സംഭവത്തിന് ശേഷം താൻ പഠിക്കുന്ന സർവകലാശാലയിലെ ഒരു കൂട്ടം സീനിയർ തന്നെ ശാരീരികമായി ഉപദ്രവിച്ചതായി ജൂനിയർ വിദ്യാർത്ഥി റാഗിംഗ് പരാതി രജിസ്റ്റർ ചെയ്തു. പരാതിയുടെ അടിസ്ഥാനത്തിൽ ചിരാഗ് റാണ (19), ദിവ്യാൻഷ് (19), കരൺ ഡോഗ്ര (19) എന്നിവരെ പോലീസ് അറസ്റ്റ് ചെയ്തു. തുടർന്ന് സർവകലാശാലയിൽ നിന്ന് പുറത്താക്കുകയും ചെയ്തു.
വീഡിയോ വൈറലായതോടെ സോഷ്യൽ മീഡിയയിൽ രോഷം ആളിപ്പടർന്നു. റാഗിംഗ് കുറ്റകൃത്യമാണെന്നും പ്രതികൾക്ക് ഒരു സ്ഥാപനത്തിലും പ്രവേശനം നൽകരുതെന്നും ചിലർ ആവശ്യപ്പെട്ടു. ഈ യുവാക്കൾ അവരുടെ ഭാവി തന്നെ നശിപ്പിച്ചു എന്നാണ് മറ്റൊരു കമൻറ്.