ഡൽഹിയിൽ കുടിവെള്ളക്ഷാമം തുടരുന്നു. കടുത്ത ചൂടിനെ തുടർന്ന് കുടിവെള്ളക്ഷാമം നേരിടുന്ന പ്രദേശങ്ങളിൽ ടാങ്കറുകളിൽ വെള്ളമെത്തിക്കുന്നുണ്ടെങ്കിലും പ്രാഥമിക ആവശ്യങ്ങൾക്ക് പോലും ഇത് തികയാത്തത് ജനങ്ങളെ പ്രതിസന്ധിയിലാക്കുന്നു. അതേസമയം, കുടിവെള്ളക്ഷാമം ഹരിയാനയുമായി രാഷ്ട്രീയ സംഘർഷത്തിനും കാരണമാകുന്നുണ്ട്.
ആവശ്യമായ വെള്ളം നൽകുന്നില്ലെന്ന ദില്ലി സർക്കാരിന്റെ ആരോപണങ്ങൾ ഹരിയാന മുഖ്യമന്ത്രി നായിബ് സിങ് സെയ്നി നിഷേധിച്ചു. കരാർ അനുസരിച്ചുള്ളതിലും കൂടുതൽ അളവ് വെള്ളം ദില്ലിക്കു നൽകുന്നുണ്ടെന്നാണ് ഹരിയാന സർക്കാരിന്റെ വാദം. ശുദ്ധജലക്ഷാമത്തെക്കുറിച്ചു ചർച്ച ചെയ്യാൻ മന്ത്രി അതിഷിയുമായി ലഫ്. ഗവർണർ വി.കെ. സക്സേന കൂടിക്കാഴ്ച നടത്തുമെന്ന് രാജ്നിവാസ് ഓഫിസ് അറിയിച്ചു.
ഹരിയാനയിൽ നിന്നു വെള്ളം ലഭിക്കാത്തതിനെക്കുറിച്ചു സംസാരിക്കാൻ ലഫ്. ഗവർണറുമായി കൂടിക്കാഴ്ചയ്ക്കു സമയം തേടിയിട്ടുണ്ടെന്ന് അതിഷി എക്സിൽ പോസ്റ്റ് ചെയ്തിരുന്നു. തൊട്ടുപിന്നാലെയാണ് ലഫ്. ഗവർണർ മന്ത്രിയുമായി കൂടിക്കാഴ്ച നടത്തുമെന്ന് രാജ്നിവാസ് ഓഫിസ് അറിയിച്ചത്.