സംസ്ഥാനത്തെ വൈദ്യുതി ഉപയോഗവും പീക്ക് ടൈം പവർ ഡിമാൻഡും സർവകാല റെക്കോർഡിലേക്ക്. പ്രതിദിന വൈദ്യുതി ഉപഭോഗം ആദ്യമായി 11 കോടി യൂണിറ്റ് കടന്നു. 110.10 ദശലക്ഷം യൂണിറ്റാണ് ഇന്നലത്തെ മൊത്തം വൈദ്യുതി ഉപഭോഗം. 5487 മെഗാവാട്ടായിരുന്നു ഇന്നലെ പീക്ക് ടൈം ഡിമാൻഡ്. വേനൽമഴ എത്തിയപ്പോൾ ഉപഭോഗത്തിൽ നേരിയ കുറവുണ്ടായി. എന്നാൽ ഇതിന് ശേഷം ഉപഭോഗത്തിൽ വൻ വർധനവാണ് ഉണ്ടായിരിക്കുന്നത്.
ഇലക്ട്രിക് വാഹനങ്ങളുടെ എണ്ണം അതിവേഗം വർധിച്ചുവരികയാണ്. വലിയ അളവിൽ വൈദ്യുതി ഉപയോഗിക്കുന്ന ഇലക്ട്രിക് വാഹനങ്ങൾ രാത്രിയിൽ ചാർജ് ചെയ്യുന്നതിനാൽ ട്രാൻസ്ഫോർമറുകളുടെ ലോഡ് വർദ്ധിക്കുകയും ഫ്യൂസുകൾ പോകുന്നതിനും ഇടയാകുന്നുണ്ടെന്ന് കെഎസ്ഇബി മുന്നറിയിപ്പ് നൽകി.
ഇതുമൂലം പ്രദേശമാകെ ഇരുട്ടിലായിരിക്കുകയാണ്. അർദ്ധരാത്രി 12ന് ശേഷമോ പകൽ സമയത്തോ ഇലക്ട്രിക് വാഹനങ്ങൾ ചാർജ് ചെയ്യാനുള്ള സംവിധാനം ഏർപ്പെടുത്തുന്നത് ഉചിതമാണെന്ന് കെഎസ്ഇബി അറിയിച്ചു.