തിരുവനന്തപുരം: നടൻ കൊല്ലം തുളസിയിൽ നിന്ന് 20 ലക്ഷം രൂപ തട്ടിയ കേസിൽ തിരുവനന്തപുരം സ്വദേശികളായ അച്ഛനും മകനും അറസ്റ്റിൽ. മ്യൂസിയം പോലീസാണ് അറസ്റ്റ് ചെയ്തത്. നിക്ഷേപിക്കുന്ന പണം ഇരട്ടിയായി തിരിച്ച് നൽകുമെന്ന് പറഞ്ഞാണ് ഇവർ തട്ടിപ്പ് നടത്തിയത്. ജി കാപ്പിറ്റൽ എന്ന കമ്പനി ഉണ്ടാക്കിയാണ് ഇവർ പലരിൽ നിന്നും പണം തട്ടിയത്.
കൊല്ലം തുളസിയിൽ നിന്ന് ആദ്യം രണ്ട് ലക്ഷം വാങ്ങിയ പ്രതികൾ നാല് ലക്ഷമായി തിരികെ നൽകിയിരുന്നു. പിന്നീട് നാല് ലക്ഷം രൂപ അത് എട്ട് ലക്ഷമായി തിരികെ കൊടുക്കുകയും ചെയ്തു. ഇങ്ങനെ പലപ്പോഴായി പണം കൊടുത്ത് വിശ്വാസം നേടിയെടുത്തതോടെയാണ് പ്രതികൾക്ക് 20 ലക്ഷം രൂപ നടൻ കൈമാറിയത്. പണം കൈക്കലാക്കിയതോടെ പ്രതികൾ ഒളിവിൽ പോവുകയായിരുന്നു.
തിരുവനന്തപുരം സ്വദേശികളായ സന്തോഷ് കുമാർ, ദീപക് എന്നിവരാണ് പിടിയിലായത്. അച്ഛനും മകനും ചേർന്ന് നടത്തിയ തട്ടിപ്പിൽ നിരവധി പേർ ഇരകളായെന്നും കണ്ടെത്തി. രണ്ടു വർഷമായി ഇവർ ഒളിവിലായിരുന്നു. ഡൽഹിയിൽ നിന്നാണ് െേപാലീസ് പ്രതികളെ പിടികൂടിയത്. തിരുവനന്തപുരം ജില്ലയിലെ വിവിധയിടങ്ങളിലായി പ്രതികളുടെ പേരിൽ വിവിധ കേസുകളും രജിസ്റ്റർ ചെയ്തിട്ടുണ്ട്.
ദിവസവും ഇത്തരത്തിൽ ഒട്ടേറെ തട്ടിപ്പ് കേസുകളാണ് രജിസ്റ്റർ ചെയ്യുന്നത്. ഓൺലൈൻ തട്ടിപ്പുകളും നിരവധിയാണ്. പൊലീസ് നിരന്തരം ജാഗ്രത നിർദ്ദേശങ്ങൾ നൽകുമ്പോഴും ആളുകൾ വിഷയത്തിൻ്റെ ഗൌരവം ഉൾക്കൊള്ളുന്നില്ല എന്നതും വാസ്തവമാണ്.