തിരുവനന്തപുരം: യൂത്ത് കോൺഗ്രസ് അധ്യക്ഷൻ രാഹുൽ മാങ്കൂട്ടത്തിലിന്‍റെ അറസ്റ്റിൽ പ്രതികരിച്ച് മന്ത്രി പി രാജീവ്. യുഡിഎഫ് കാലത്ത് എംഎല്‍എമാരെയടക്കം പാതിരാത്രി അറസ്റ്റ് ചെയ്തിട്ടുണ്ടെന്ന് അദ്ദേഹം പറഞ്ഞു. പോലീസ് നടപടികൾ നിഷ്പക്ഷമായിട്ടാണ് നടക്കുന്നത്. അതിന് ഉദാഹരണമായി നിരവധി സംഭവങ്ങൾ ഉണ്ടായിട്ടുണ്ടെന്നും മന്ത്രി തലസ്ഥാനത്ത് പറഞ്ഞു.
എസ്എഫ്ഐ പ്രവർത്തകയായ സാന്ദ്രയെ കഴിഞ്ഞ മാസം വീട്ടിൽ നിന്നല്ലേ അറസ്റ്റ് ചെയ്തത്? അത് മാധ്യമങ്ങൾ വാർത്തയാക്കിയതേയില്ല. ഡിവൈഎഫ്ഐ പ്രവർത്തകർക്കെതിരെ കേസെടുത്തത് പ്രതിപക്ഷനേതാവ് വരെ പറഞ്ഞിരുന്നതാണ്. പിന്നെ ചാൻസലർക്കെതിരെ പ്രതിഷേധിച്ച എസ്എഫ്ഐ പ്രവർത്തകർക്കെതിരെ 124 എ പ്രകാരം കേസെടുത്തു. ഇന്ത്യയുടെ ചരിത്രത്തിൽ തന്നെ ആദ്യമായിട്ടാണ് ഈ വകുപ്പ് പ്രകാരം കേസെടുക്കുന്നത്.
ഇത്തരത്തിൽ ഇടതുപക്ഷ പ്രവർത്തകർക്കെതിരെ ഗൗരവമുള്ള കേസുകൾ എടുക്കുന്ന ഇതേ പോലീസ് യൂത്ത് കോൺഗ്രസുകാർക്കെതിരെ കേസെടുക്കുമ്പോൾ മാത്രം ആദ്യമായിട്ടെന്തോ നടക്കുന്നെന്ന പോലെയാണ് ചില വാർത്തകൾ വരുന്നത്. യൂത്ത് കോൺഗ്രസ് അക്രമത്തിന്‍റെ ഡിജിറ്റൽ തെളിവുകൾ പുറത്തുവിട്ടത് മാധ്യമങ്ങൾ തന്നെയല്ലേ. അതുകൂടി ഈ വേളയിൽ പ്രദർശിപ്പിച്ചാൽ പലരുടെയും തെറ്റിധാരണ ഒഴിവാക്കാമല്ലോയെന്നും മന്ത്രി പി രാജീവ് ചോദിച്ചു.
പ്രതിപക്ഷത്തിന് പറയാൻ വിഷയങ്ങളില്ല. ഈ നാട് അഭിമുഖീരിക്കുന്ന പ്രധാനപ്പെട്ട പ്രശ്‌നങ്ങളില്‍ അവര്‍ നിലപാട് സ്വീകരിക്കുന്നില്ല. പോലീസിന് രാഷ്ട്രീയമില്ല. അവര്‍ നിയമപരമായി തന്നെ മുന്നോട്ട് പോകും. പോലീസ് ഏതെങ്കിലും ഒരു താൽപ്പര്യത്തിന് പുറത്ത് പ്രവര്‍ത്തിച്ചതായി ഈ നടപടിയെ കാണാനാകില്ല. മുഖ്യമന്ത്രി രക്ഷാപ്രവര്‍ത്തനമാണെന്ന് പറഞ്ഞ വിഷയത്തില്‍ പോലീസ് വധശ്രമത്തിനാണ് കേസെടുത്തതെന്ന് പ്രതിപക്ഷ നേതാവ് തന്നെ ചൂണ്ടിക്കാട്ടിയതാണ്.
അതുവഴി, പോലീസ് നിഷ്പക്ഷമായാണ് പ്രവര്‍ത്തിക്കുന്നതെന്ന് അദ്ദേഹം തന്നെ അടിവരയിട്ട് ഉറപ്പിച്ചു. സമരത്തിനിടെ ചില ഘട്ടങ്ങളില്‍ അക്രമം നടന്നിട്ടുണ്ടെന്ന് യുഡിഎഫ് കണ്‍വീനര്‍ തന്നെ പറഞ്ഞിരുന്നു. അപ്പോൾ സ്വാഭാവികമായി ഇത്തരം കേസുകള്‍ വരും. കേസുകളില്‍ പോലീസ് അറസ്റ്റ് ചെയ്യും. ചിലതില്‍ കോടതി റിമാന്‍ഡ് ചെയ്യും, ചിലതില്‍ കോടതി ജാമ്യം നല്‍കും. പ്രതിപക്ഷം സംഘര്‍ഷം തുടര്‍ന്നാല്‍ ഇനിയും നിയമനടപടികള്‍ സ്വീകരിക്കുമെന്നും മന്ത്രി വ്യക്തമാക്കി.