അലാസ്ക: അപ്രതീക്ഷിതമായുണ്ടായ എയർലൈൻ അപകടത്തെ തുടർന്ന് എല്ലാ ബോയിംഗ് 737-8 മാക്‌സ് വിമാനങ്ങളിലെയും എമർജൻസി എക്‌സിറ്റുകളിലും പരിശോധന നടത്താൻ നിർദ്ദേശം. ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) ആണ് ഇന്ത്യൻ എയർ ഓപ്പറേറ്റർമാരോട് പരിശോധന നിർദ്ദേശം നൽകിയത്. 174 യാത്രക്കാരും ആറ് ജീവനക്കാരും സഞ്ചരിച്ച അലാസ്ക എയർലൈൻസ് വിമാനത്തിന്റെ പുറത്തുകടക്കുന്ന വാതിലും തൊട്ടടുത്തുള്ള ആളില്ലാത്ത സീറ്റും പൊട്ടിത്തെറിച്ചതിനെത്തുടർന്നാണ് അടിയന്തിര നിർദേശം നല്കിയത്. അപകടത്തെ തുടർന്ന് വിമാനം അടിയന്തര ലാൻഡിംഗ് നടത്തി.
അലാസ്ക എയർലൈൻസിന്റെ ബോയിംഗ് 737-9 വിമാനമായിരുന്നു അപകടത്തിൽപെട്ടത്. അലാസ്ക എയർലൈൻസ് വിമാനത്തിലുണ്ടായ സംഭവത്തിന് ശേഷം ബോയിംഗിൽ നിന്ന് മാർഗനിർദേശം ലഭിച്ചിട്ടില്ല. എന്നാൽ, സംഭവത്തെക്കുറിച്ച് തങ്ങൾക്ക് അറിയാമെന്നും അന്വേഷണത്തെ പിന്തുണയ്ക്കാൻ സാങ്കേതിക സംഘം തയ്യാറാണെന്നും എയ്‌റോസ്‌പേസ് കമ്പനി അറിയിച്ചിട്ടുണ്ട്. എക്സിറ്റ് വാതിലും സീറ്റും പൊട്ടിത്തെറിച്ച വിമാനം രണ്ട് മാസം മുമ്പ് അസംബ്ലി ലൈനിൽ നിന്ന് സർട്ടിഫിക്കേഷൻ നേടിയ ഒരു പുതിയ വിമാനമായിരുന്നു.
സംഭവത്തെ തുടർന്ന് അലാസ്ക എയർലൈൻസ് തങ്ങളുടെ മുഴുവൻ ബോയിംഗ് 737-9 വിമാനങ്ങളും താൽക്കാലികമായി നിർത്തിവച്ചു. പൂർണമായ അറ്റകുറ്റപ്പണികൾക്കും സുരക്ഷാ പരിശോധനകൾക്കും ശേഷം ഓരോ വിമാനങ്ങളും തിരികെ കൊണ്ടുവരുമെന്ന് അലാസ്ക എയർലൈൻസ് സിഇഒ ബെൻ മിനിക്കുച്ചി പറഞ്ഞു.
റഡ്ഡർ കൺട്രോൾ സിസ്റ്റത്തിൽ സാധ്യമായ എല്ലാ 737 MAX വിമാനങ്ങളും പരിശോധിക്കാൻ വിമാനക്കമ്പനികളോട് അഭ്യർത്ഥിക്കുന്നുവെന്ന് കഴിഞ്ഞ ആഴ്ച ബോയിംഗ് പറഞ്ഞിരുന്നു.