സിറിയ: ഇസ്രായേൽ വ്യോമാക്രമണത്തിൽ ഇറാൻ്റെ ഉന്നത കമാൻഡർ കൊല്ലപ്പെട്ടതായി റിപ്പോർട്ടുകൾ. ഇറാൻ്റെ ഇസ്ലാമിക് റെവല്യൂഷണറി ഗാർഡ് കോർപ്സിൻ്റെ സീനിയർ കമാൻഡറും സിറിയ, ലെബനൻ സൈനിക നീക്കങ്ങളുടെ ചുമതലക്കാരനുമായ സയ്യിദ് റെസ മൗസവിയാണ് വ്യോമാക്രമണത്തിൽ കൊല്ലപ്പെട്ടത്. തിങ്കളാഴ്ച സിറിയയിൽ ഇസ്രായേൽ നടത്തിയ ശക്തമായ വ്യോമാക്രമണത്തിലാണ് റെസ മൗസവി കൊല്ലപ്പെട്ടിരിക്കുന്നത്.
ആക്രമണത്തിൻ്റെ പശ്ചാത്തലത്തിൽ ഡമാസ്‌കസ് ഗ്രാമപ്രദേശത്തുള്ള സെറ്റ് സൈനബ് പ്രദേശത്ത് വൻ സ്‌ഫോടന ശബ്ദം കേട്ടതായി ദ ജെറുസലേം പോസ്റ്റിൻ്റെ റിപ്പോർട്ടിൽ വ്യക്തമാക്കുന്നു. നിരവധി നാളുകളായി ഡെമാസ്കസ് അന്താരാഷ്ട്ര വിമാനത്താവളത്തെ ലക്ഷ്യം വച്ച് ഇസ്രായേൽ ആക്രമണങ്ങൾ നടത്തുന്നുണ്ട്.
ഈ മേഖലയിൽ ഇറാൻ്റെ പിന്തുണയോടു കൂടിയാണ് സിറിയ നീക്കങ്ങൾ നടത്തുന്നത്. കഴിഞ്ഞ ദിവസത്തെ ആക്രമണത്തിൽ വിമാനത്താവളത്തിന് സമീപം വലിയ രീതിയിൽ പുകമഞ്ഞ് ഉയർന്നതായി സമൂഹമാധ്യമങ്ങളിൽ പ്രസിദ്ധീകരിച്ച ചില വീഡിയോകളിൽ പറയുന്നതായും ഇന്ത്യ റ്റുഡേ റിപ്പോർട്ട് ചെയ്യുന്നു.
സയ്യിദ് റെസ മൗസവിയുടെ മരണം ഇറാനിയൻ സർക്കാർ ഉടമസ്ഥതയിലുള്ള ബ്രോഡ്കാസ്റ്റർ പ്രസ് ടിവി സ്ഥിരീകരിച്ചിട്ടുണ്ട്. സിറിയയിലെ `ഉന്നത ഉപദേശകൻ´ കൊല്ലപ്പെട്ടുവെന്നാണ് മാധ്യമങ്ങൾ റിപ്പോർട്ട് ചെയ്തത്. 2020 ജനുവരിയിൽ യുഎസ് ഡ്രോൺ ആക്രമണത്തിൽ കൊല്ലപ്പെട്ട ഖുദ്‌സ് ഫോഴ്‌സിൻ്റെ മുൻ തലവൻ ഖാസിം സുലൈമാനിയുടെ അടുത്ത കൂട്ടുകാരനായിരുന്നു മൗസവയെന്ന് പ്രസ്സ് ടി വി റിപ്പോർട്ട് ചെയ്യുന്നു.
കൊള്ളക്കാരും ക്രൂരന്മാരുമായ സയൻസ് ഭരണകൂടം ഈ കൊലപാതകത്തിനായി വലിയ തുക മുടക്കിയെന്ന് നിസംശയം പറയാമെന്നാണ് ഇറാൻ്റെ വാദം. ഇറാൻ പ്രസിഡൻ്റ് ഇബ്രാഹിം റൈസിയാണ് ഇക്കാര്യം പറഞ്ഞത്. മൗസവിയുടെ കൊലപാതകവുമായി ബന്ധപ്പെട്ട് പ്രസ് ടിവിയിൽ വായിച്ച പ്രസ്താവനയിലൂടെയാണ് ഇറാൻ പ്രസിഡൻ്റ് ഇസ്രായേലിനെതിരെ രംഗത്തെത്തിയത്.