ദുബായ് : യുഎഇയിലെ പല ഭാഗങ്ങളിലും ശക്തമായ മഴ. ചൂടു കാലത്തോട് വിടപറയാനെത്തിയ മഴ ആളുകൾ നന്നായി ആസ്വദിക്കുന്നു. രാജ്യത്തിന്റെ മിക്ക ഭാഗങ്ങളിലും രാവിലെ മുതൽ മഴ പെയ്യുകയാണ്. റോഡുകളിൽ പലയിടത്തും മഴ വെള്ളം കെട്ടി നിന്നു. ഇതുമൂലം ഗതാഗതം മന്ദഗതിയിലാണ്. ആകാശം മേഘാവൃതമായതിനാൽ ദേശീയ കാലാവസ്ഥാ കേന്ദ്രം (എൻസിഎം) രാജ്യത്തുടനീളം മഞ്ഞ, ചുവപ്പ് അലർട്ടുകൾ പുറപ്പെടുവിച്ചു.
ദുബായ്, അബുദാബി, ഉമ്മുൽ ഖുവൈൻ എന്നിവിടങ്ങളിൽ ഇന്ന് പുലർച്ചെയാണ് മഴ റിപോർട്ട് ചെയ്തത്. ദുബായിൽ ഉച്ചയ്ക്ക് ശേഷവും മഴ തുടരുന്നു. അസ്ഥിരമായ കാലാവസ്ഥയുടെ തുടർച്ച ഉണ്ടാകുമെന്നും ഒറ്റപ്പെട്ട പ്രദേശങ്ങളിൽ ചില സമയങ്ങളിൽ ആകാശം ഭാഗികമായി മേഘാവൃതമോ ആയിരിക്കുമെന്നും എൻസിഎം റിപോർട്ട് ചെയ്തു. നാളെയും മഴ പ്രതീക്ഷിക്കാം. താപനില കുറയുമെന്നാണ് പ്രതീക്ഷിക്കുന്നത്. ശരാശരി താപനില 30ൽ താഴെയായിരിക്കുമെന്നും പരമാവധി താപനില 39 ഡിഗ്രി സെൽഷ്യസിൽ എത്തുമെന്നും കുറഞ്ഞ താപനില 19 ഡിഗ്രി സെൽഷ്യസിലേക്ക് താഴുമെന്നും പ്രതീക്ഷിക്കുന്നു.
ദുബായിൽ ഇപ്പോൾ 29 ഡിഗ്രി സെൽഷ്യസാണ് മേഘാവൃതമായ ആകാശം. പരമാവധി ഈർപ്പം 85 ശതമാനത്തിൽ എത്തുമെന്നാണ് പ്രതീക്ഷിക്കുന്നത്. ശക്തമായ കാറ്റ് ആവർത്തിച്ച് വീശാൻ സാധ്യതയുണ്ട്. മണിക്കൂറിൽ 10-25 കി.മീ വേഗത്തിൽ ചിലപ്പോൾ മണിക്കൂറിൽ 60 കി.മീ വരെ വേഗത്തിൽ എത്താം. പൊടിക്കാറ്റ് വീശുമെന്നും പ്രതീക്ഷിക്കുന്നു, ചില പ്രദേശങ്ങളിൽ ദൃശ്യപരത കുറയുന്നു.