പെറു: ലോകകപ്പ് യോഗ്യതാ മത്സരത്തിൽ പെറുവിനെ ഒരു ഗോളിന് തോൽപ്പിച്ച് ബ്രസീൽ. ഇതോടെ രണ്ട് മത്സരങ്ങളും ജയിച്ച ബ്രസീൽ യോഗ്യതാ റൗണ്ട് പോയിന്റ് പട്ടികയിൽ ഒന്നാമതെത്തി. അർജന്റീനയാണ് രണ്ടാമത്. ഒറ്റപ്പെട്ട ചില മുന്നേറ്റങ്ങളും ആക്രമങ്ങളും ഉണ്ടായതൊഴിച്ചാൽ പെറുവുമായുള്ള മത്സരം വിരസമായിരുന്നു.
ആദ്യപകുതിയിൽ ബ്രസീലിനായിരുന്നു മുൻതൂക്കം. നെയ്മറും റിച്ചാർലിസണും കാസിമെറോയും വിനീഷ്യസ് ജൂനിയറും നിറഞ്ഞുകളിച്ചു. 17-ാം മിനിറ്റിൽ റാഫീന്യ ബ്രസിലിനുവേണ്ടി ആദ്യ ഗോൾ നേടിയെങ്കിലും റഫറി ഓഫ്‌സൈഡ് വിളിച്ചു. 29-ാം മിനിറ്റിൽ റിച്ചാർലിസൺ വീണ്ടും വല കുലുക്കി, എന്നാൽ, അപ്പോഴും നിർഭാഗ്യം ഓഫ്സൈഡിന്റെ രൂപത്തിലെത്തി.
രണ്ടാം പകുതിയിലാണ് ഏതാനും നല്ല മുന്നേറ്റങ്ങൾ ഇരു ടീമിന്റെയും ഭാഗത്തുനിന്നും ഉണ്ടായത്. രണ്ടിടങ്ങളിലും പ്രതിരോധ മികവ് കൊണ്ടാണ് ഗോൾ പിറക്കാതെ പോയത്. ഒടുവിൽ 90-ാം മിനിറ്റിൽ നെയ്മറിന്റെ കോർണർ കിക്ക് തകര്‍പ്പൻ ഹെഡററിലൂടെ മാർക്കിഞ്ഞോസ് വലയിലെത്തിച്ചു.