ചെന്നൈ: ബെംഗളുരു-ചെന്നൈ എക്സ്പ്രസ് ഹൈവേ ഈ വർഷം അവസാനത്തോടെയോ അടുത്ത വർഷം ആദ്യത്തോടെയോ ഉണ്ടാകുമെന്ന് കേന്ദ്ര മന്ത്രി നിതിൻ ഗഡ്കരി. ഇതോടെ രണ്ട് നഗരങ്ങൾ തമ്മിലുള്ള യാത്രാ സമയം അഞ്ച് മണിക്കൂറിൽ നിന്നും രണ്ട് മണിക്കൂറായി കുറയും. ചെന്നൈയേയും രാജ്യ തലസ്ഥാനത്തെയും പുതിയ ഹൈവേ വഴി ബന്ധിപ്പിക്കുമെന്നും അദ്ദേഹം വ്യക്തമാക്കി.
‘ ബെംഗളൂരു–ചെന്നൈ എക്സ്പ്രസ് ഹൈവേ പദ്ധതി ഈ വർഷം അവസാനമോ അടുത്ത വർഷം ജനുവരിയിലോ ആരംഭിക്കും. ചെന്നൈയിലെ ദേശീയപാത പദ്ധതികളുടെ പുരോഗതി ഞാൻ വിലയിരുത്തുകയുണ്ടായി. നിങ്ങൾക്ക് ആഡംബര ബസ്സുകളും സ്ലീപ്പർ കോച്ചുകളും ഈ മേഖലയിൽ ആരംഭിക്കാം. ഡൽഹി, ചെന്നൈ, കന്യാകുമാരി, തിരുവനന്തപുരം, കൊച്ചി, ബെംഗളൂരു, ഹൈദരാബാദ് എന്നീ നഗരങ്ങളെ വിവിധ ഹൈവേ പദ്ധതികൾ വഴി ബന്ധിപ്പിക്കും. ’– അശോക് ലെയ്‍ലാൻഡിന്റെ 75ാം വാർഷികാഘോഷങ്ങളിൽ പങ്കെടുത്ത് സംസാരിക്കുകയായിരുന്നു മന്ത്രി.