കൊല്ലം ശാസ്താംകോട്ടയിലെ തിരക്കേറിയ ഭരണിക്കാവ് റോഡിൽ ബൈക്കിൽ സഞ്ചരിച്ചുകൊണ്ട് സോപ്പ് തേച്ചു കുളിച്ച യുവാക്കൾ പോലീസിന്റെ പിടിയിലായി. കഴിഞ്ഞ ദിവസമാണ് സംഭവം.
കനത്ത മഴ പെയ്തതോടെ യുവാക്കൾക്ക് കുളിക്കാനൊരു മോഹം തോന്നി. കടയിൽ നിന്നും സോപ്പ് വാങ്ങി ഷർട്ട് ഊരി ബൈക്കോടിച്ചങ്ങ് കുളിച്ചു. വൈറലാകാൻ സുഹൃത്തുക്കളെ കൊണ്ട് ദൃശ്യങ്ങൾ പകർത്തി സാമൂഹിക മാധ്യമങ്ങളിലും ഇട്ടു. വീഡിയോ ശ്രദ്ധയിൽപെട്ട ശാസ്താംകോട്ട പോലീസ് യുവാക്കളെ സ്റ്റേഷനിലേക്ക് വിളിച്ചു വരുത്തി. സിനിമാപ്പറമ്പ് സ്വദേശികളായ അജ്മൽ, ബാദുഷ എന്നിവർക്കെതിരെ ഗതാഗത നിയമം ലംഘിച്ചതിന് കേസുമെടുത്തു.
അപകടകരമായി വാഹനം ഓടിച്ചതിന് പിഴ ഈടാക്കുകയും ശാസിച്ച് വിടുകയും ചെയ്തു. ബൈക്കിലിരുന്നു കുളിച്ചതെന്തിനെന്ന പോലീസ് ഉദ്യോഗസ്ഥരുടെ ചോദ്യത്തിന് യുവാക്കൾ നൽകിയ മറുപടി രസകരമായിരുന്നു. ”വൈകിട്ട് കളി കഴിഞ്ഞു മടങ്ങുകയായിരുന്നു. അപ്പോൾ നല്ല മഴ. വീട്ടിൽ ചെന്ന് കുളിക്കേണ്ട സമയം ലാഭിക്കാമല്ലോ എന്നുകരുതിയാണ് ചെയ്തത്”. ഏതായാലും പോലീസ് പൊക്കിയ യുവാക്കൾ സോഷ്യൽ മീഡിയയിൽ ഇട്ട വീഡിയോ ഇപ്പോൾ ശരിക്കും വൈറലായിരിക്കുകയാണ്.