രാജ്യാന്തരതലത്തിൽ വളർന്നുവരുന്ന ക്രിപ്റ്റോ ഭ്രമം ഏറ്റെടുത്ത് ഗൂഗിളും. ഉപയോക്താക്കൾക്കു ക്രിപ്റ്റോ കറൻസികളിൽ പേയ്മെന്റ് പൂർത്തീകരിക്കാനാണ് അവസരം ഒരുങ്ങുന്നത്. ക്രിപ്റ്റോ ഇടപാടുകൾ സുഗമമായി പൂർത്തീകരിക്കാൻ ഗൂഗിൾ ക്രിപ്റ്റോ എക്‌സ്‌ചേഞ്ചായ കോയിൻ ബേസുമായി സഹകരിക്കും. തെരഞ്ഞെടുത്ത ക്രിപ്റ്റോ കറൻസികളിലാകും ഇടപാട് സാധ്യമാകുക. ആദ്യഘട്ടത്തിൽ ഗൂഗിളിന്റെ ക്ലൗഡ് സേവനങ്ങൾക്കാക്കും ക്രിപ്റ്റോ പേയ്മെന്റുകൾ സാധ്യമാക്കുക. അടുത്ത വർഷം ആദ്യം മുതൽ Web3 സ്പെയ്സിലെ ഉപഭോക്താക്കൾക്ക് ക്രിപ്റ്റോ അടിസ്ഥാനമാക്കിയുള്ള പേയ്മെന്റുകൾ ലഭ്യമാകുമെന്നാണു ഗൂഗിൾ, കോയിൻ ബേസ് വൃത്തങ്ങൾ നൽകുന്ന സൂചന.
ബിസിനസുകളെ ക്രിപ്റ്റോ കറൻസികൾ സ്വീകരിക്കാനും, പരിവർത്തനം ചെയ്യാനും സഹായിക്കുന്ന കോയിൻ ബേസ് കൊമേഴ്‌സ് ടൂളിന്റെ സഹായത്തോടെയാകും പദ്ധതി പ്രവർത്തിക്കുക. ബിറ്റ്‌കോയിൻ (Bitcoin), എതേറിയം (Ethereum), യുഎസ്ഡി കോയിൻ (USD Coin), ടെതർ യുഎസ്ഡി (Tether USD), ഡോഷ്‌കോയിൻ (Dogecoin), ഷിബ ഇനു (Shiba Inu) എന്നിവ ഉൾപ്പെടെയുള്ള പ്രമുഖ കോയിനുകളെല്ലാം തന്നെ ഉപയോക്താക്കൾക്കു പേയ്‌മെന്റുകൾക്കായി ഉപയോഗിക്കാൻ സാധിക്കുമെന്നാണു വിലയിരുത്തൽ.
ക്രിപ്റ്റോകറൻസികൾ സംഭരിക്കുന്നതിനും, വ്യാപാരം ചെയ്യുന്നതിനുമായി വലിയ കമ്പനികൾക്കായി നിർമ്മിച്ച ‘ഇൻസ്റ്റിറ്റിയൂഷണൽ ഗ്രേഡ്’ ക്രിപ്റ്റോ ട്രേഡിംഗ് പ്ലാറ്റ്ഫോമായ Coinbase Prime ഉപയോഗിക്കാനും ഗൂഗിൾ പദ്ധതിയിടുന്നുണ്ട്. കരാറിന്റെ ഭാഗമായി ആമസോൺ വെബ് സേവനങ്ങൾ അടിസ്ഥാനമാക്കി പ്രവർത്തിക്കുന്ന ഡാറ്റയുമായി ബന്ധപ്പെട്ട ചില ആപ്ലിക്കേഷനുകൾ കോയിൻബേസ് ഗൂഗിൾ ക്ലൗഡിലേക്കു മറ്റുന്നതായി സിഎൻബിസി റിപ്പോർട്ട് വ്യക്തമാക്കുന്നു.
ധാരണയുടെ ഭാഗമായി Coinbase Node ഗൂഗിൾ ഉപയോഗിക്കും. ബ്ലോക്ചെയിനുകളിലേക്ക് ആക്സസ് നേടാനും, വികേന്ദ്രീകൃത ആപ്പുകൾ നിർമ്മിക്കാനും, ബിഗ്ക്വറി ക്രിപ്റ്റോ പബ്ലിക് ഡാറ്റാസെറ്റുകൾക്ക് ശക്തി പകരാനും ഡെവലപ്പർമാർ് ഉപയോഗിക്കാനാകുന്ന ഒരു ടൂളാണ് കോയിൻബേസ് നോഡ്. Web3 ഡെവലപ്പർമാർക്ക് ഒരു ബാക്ക് എൻഡ് നൽകുകയെന്ന ഗൂഗിളിന്റെ ലക്ഷ്യവുമായി ഒത്തുപോകുന്നതാണ് ഈ നീക്കങ്ങൾ. ഇക്കാര്യങ്ങൾക്കു മേൽനോട്ടം നൽകുന്നതിനായി ഈ വർഷം ആദ്യം ഗൂഗിൾ ഒരു ടീമിനെ രൂപീകരിച്ചതായും റിപ്പോർട്ടുകളുണ്ട്.
Web3 -ൽ നിർമ്മാണം വേഗത്തിലും എളുപ്പത്തിലും ആക്കാൻ തങ്ങൾ ആഗ്രഹിക്കുന്നതായും, കോയിൻബേസുമായുള്ള പങ്കാളിത്തം ഡെവലപ്പർമാരെ ലക്ഷ്യത്തിലേക്ക് ഒരു ചുവട് കൂടി അടുപ്പിക്കുന്നതുമാണെന്നു ഗൂഗിൾ ക്ലൗഡിന്റെ സിഇഒ തോമസ് കുര്യൻ പറഞ്ഞു. ഈ വർഷം ക്രിപ്റ്റോ കറൻസികളെ സംബന്ധിച്ചു വലിയ തിരിച്ചടിയായിരുന്നു. ആഗോള സാമ്പത്തിക മാന്ദ്യ ഭീതിയും, പണപ്പെരുപ്പവും ഓഹരി വിപണികളെ പോലെ തന്നെ ക്രിപ്റ്റോ കറൻസികളെയും മുകളിൽ നിന്നു താഴെയെത്തിച്ചു. സ്‌റ്റേബിൾ കോയിനുകൾ ഡോളറിനെതിരേ വീണു. മറ്റു പ്രധാന ക്രിപ്റ്റോ കറൻസികളും തളർച്ചയിലാണ്.
ക്രിപ്റ്റോകറൻസിയുടെ ശൃംഖലയെ കൂടുതൽ ഊർജ്ജക്ഷമതയുള്ളതാക്കാനുള്ള നീക്കമായ ദി മെർജിനെ തുടർന്ന് 2022 -ൽ എതേറിയം കോയിനുകളുടെ മൂല്യം 65 ശതമാനം ഇടിഞ്ഞു. ഈ വർഷം ബിറ്റ്‌കോയിൻ 59 ശതമാനം താഴ്ന്നു. അതേസമയം കൂടുതൽ രാജ്യങ്ങൾ ക്രിപ്റ്റോ കറൻസികൾക്ക് അനുകൂലമാകുന്നതും വർഷം കണ്ടു. ഭാവിയുടെ വാഗ്ദാനമായാണ് ക്രിപ്റ്റോ കറൻസികളെ പലരും കാണുന്നത്. മെറ്റാവേഴ്‌സ്, എൻഎഫ്ടി തുടങ്ങിയവ ക്രിപ്റ്റോ കറൻസികൾക്ക് ഊർജം പകരുമെന്ന കാര്യത്തിൽ തർക്കമില്ല. മെർജിനെ തുടർന്നു ഊർജച്ചെലവ് 90 ശതമാനത്തിനു മുകളിൽ കുറഞ്ഞ എതേറിയം വരും ദിവസങ്ങളിൽ വൻ കുതിപ്പ് കാഴ്ചവയ്ക്കുമെന്നാണു വിലയിരുത്തൽ.