ലേവര്‍ കപ്പ് ഡബിള്‍സിലെ വിടവാങ്ങല്‍ മത്സരത്തില്‍ ഇതിഹാസ ടെന്നീസ് താരം റോജര്‍ ഫെഡറര്‍ക്ക് തോല്‍വി. ഫ്രാന്‍സിസ് തിയാഫോ- ജാക്‌സോക് സഖ്യമാണ് ഫെഡറര്‍-നദാല്‍ സഖ്യത്തെ പരാജയപ്പെടുത്തിയത്. സെന്റര്‍ കോര്‍ട്ടില്‍ നടന്ന മത്സരത്തില്‍ 6-4, 6-7 (2-7), 9-11 എന്ന സ്‌കോറിനാണ് തോല്‍വി. ഇതോടെ 24 വര്‍ഷം നീണ്ട ഫെഡററുടെ കരിയര്‍ അവസാനിച്ചു.
ലേവര്‍ കപ്പ് ആരംഭിക്കുന്നതിന് മുമ്പ് തന്നെ കായികലോകത്തിന്റെ എല്ലാ കണ്ണുകളും ഫെഡററിലായിരുന്നു. നിറഞ്ഞ കയ്യടികളോടെയാണ് തിങ്ങിനിറഞ്ഞ സ്റ്റേഡിയം ഈ സ്വിസ് താരത്തിന് യാത്രയയപ്പ് നല്‍കിയത്.
ആദ്യസെറ്റ് നേടി വിജയസൂചന നല്‍കിയ ഫെഡറര്‍-നദാല്‍ സഖ്യം തുടര്‍ സെറ്റുകളില്‍ തോല്‍വി സമ്മതിക്കുകയായിരുന്നു. മൂന്നാം സെറ്റില്‍ ഫെഡറര്‍ക്കും നദാലിനും ഒരു മാച്ച് പോയിന്റും മത്സരം ജയിക്കാനുള്ള അവസരവും ഉണ്ടായിരുന്നു. എന്നാല്‍ സംയമനം കൈവിടാതെ കളിച്ച ടിയാഫോയും സോക്കും ജയം കൈപ്പിടിയില്‍ ഒതുക്കി.