ദേശീയ-സംസ്ഥാന നേതാക്കളുടെ അറസ്റ്റില് പ്രതിഷേധിച്ച് പോപ്പുലര് ഫ്രണ്ട് ഓഫ് ഇന്ത്യ ആഹ്വാനം ചെയ്ത ഹര്ത്താല് തുടങ്ങി. രാവിലെ ആറ് മുതല് വൈകിട്ട് ആറുവരെയാണ് ഹര്ത്താല്. കെഎസ്ആര്ടിസി സര്വീസ് നടത്തുന്നുണ്ട്. സ്വകാര്യ വാഹനങ്ങളും ചരക്ക് വാഹനങ്ങളും നിരത്തിലുണ്ട്. ഇന്ന് നടത്താനിരുന്ന കേരള, എംജി സര്വ്വകലാശാല പരീക്ഷകള് മാറ്റിവെച്ചു. എന്നാല് പി എസ് സി പരീക്ഷകള്ക്ക് മാറ്റമുണ്ടാകില്ല.
അതേസമയം ഹര്ത്താല് ദിനത്തില് ക്രമസമാധാന പാലനത്തിന് ആവശ്യമായ നടപടികള് സ്വീകരിക്കാന് സംസ്ഥാന പോലീസ് മേധാവി അനില് കാന്ത് എല്ലാ ജില്ലാ പോലീസ് മേധാവിമാര്ക്കും നിര്ദ്ദേശം നല്കിയിട്ടുണ്ട്. അക്രമത്തില് ഏര്പ്പെടുന്നവര്, നിയമലംഘകര്, കടകള് നിര്ബന്ധമായി അടപ്പിക്കുന്നവര് എന്നിവര്ക്കെതിരെ കേസെടുത്ത് ഉടനടി അറസ്റ്റ് ചെയ്യും.
സമരക്കാര് പൊതുസ്ഥലങ്ങളില് കൂട്ടംകൂടാതിരിക്കാന് പോലീസ് ശ്രദ്ധ ചെലുത്തും. ആവശ്യമെങ്കില് കരുതല് തടങ്കലിനും നിര്ദ്ദേശിച്ചിട്ടുണ്ട്. സംസ്ഥാനത്തെ മുഴുവന് പോലീസ് സേനാംഗങ്ങളെയും ക്രമസമാധാനപാലത്തിനായി നിയോഗിക്കും. ജില്ലാ പോലീസ് മേധാവിമാരുടെ നിയന്ത്രണത്തിലുളള സുരക്ഷാക്രമീകരണങ്ങളുടെ മേല്നോട്ട ചുമതല റേഞ്ച് ഡി.ഐ.ജിമാര്, സോണല് ഐ.ജിമാര്, ക്രമസമാധാന വിഭാഗം എ.ഡി.ജി.പി എന്നിവര്ക്കാണ്.