ജനീവ: 29 രാജ്യങ്ങളിലായി നൂറിലധികം മങ്കി പോക്‌സ് കേസുകള്‍ സ്ഥിരീകരിച്ചതോടെ മുന്നറിയിപ്പുമായി ലോകാരോഗ്യ സംഘടന.
29 രാജ്യങ്ങളിലായി നൂറിലധികം കേസുകളാണ് റിപ്പോര്‍ട്ട് ചെയ്തതെന്നും എന്നാല്‍, ഈ രാജ്യങ്ങളില്‍ ഇതുവരെ മരണം രേഖപ്പെടുത്തിയിട്ടില്ലെന്നും ലോകാരോഗ്യ സംഘടനയുടെ ഡയറക്ടര്‍ ജനറല്‍ ടെഡ്രോസ് അദാനോം ഗെബ്രിയേസസ് പറഞ്ഞു. രോഗം സ്ഥിരീകരിച്ച രാജ്യങ്ങളോട് രോഗം പടരുന്ന സാഹചര്യത്തെക്കുറിച്ച്‌ വിലയിരുത്താന്‍ നിര്‍ദ്ദേശം നല്‍കിയതായും ടെഡ്രോസ് അദാനോം ഗെബ്രിയേസസ് ട്വിറ്ററിലൂടെ വ്യക്തമാക്കി.
‘മങ്കി പോക്‌സ് ആന്റിവൈറലുകളും വാക്‌സിനുകളും ലോകാരോഗ്യ സംഘടന അംഗീകരിച്ചിട്ടുണ്ട്. എന്നാല്‍, ഇവയുടെ വിതരണം പരിമിതമാണ്. രോഗത്തെ ചെറുക്കാന്‍ ഒരു ഏകോപന സംവിധാനം വികസിപ്പിക്കാന്‍ ലോകാരോഗ്യ സംഘടന പ്രവര്‍ത്തിക്കുന്നുണ്ട്. രോഗം വ്യാപിച്ച 29 രാജ്യങ്ങള്‍ക്ക് ഉടന്‍ വാക്സിനേഷന്‍ ലഭ്യമാക്കും’- ടെഡ്രോസ് അദാനോം ഗെബ്രിയേസസ് പറഞ്ഞു.
അതേസമയം, ആഫ്രിക്കന്‍ രാജ്യങ്ങള്‍ക്ക് പുറത്ത് മങ്കി പോക്‌സ് വ്യാപിക്കാന്‍ തുടങ്ങിയതിന് ശേഷം ഇതുവരെ ആയിരത്തിലധികം കേസുകളാണ് സ്ഥിരീകരിച്ചത്. നിരവധി കേസുകള്‍ നിരീക്ഷണത്തിലാണ്. യൂറോപ്പിലാണ് ഭൂരിഭാഗം കേസുകളും സ്ഥിരീകരിച്ചതും നിരീക്ഷണത്തിലുള്ളതും.