ലോക വനിതാ ദിനത്തോടനുബന്ധിച്ച് മാർച്ച് 8 മുതൽ 13 വരെ കെഎസ്ആർടിസി ബഡ്ജറ്റ് ടൂർസ് “വനിതാ യാത്രാ വാരം” ആഘോഷിക്കും. ഇക്കാലയളവിൽ സംസ്ഥാനത്തുടനീളം വനിതകൾക്ക് മാത്രമായുള്ള വിനോദയാത്രകളും സംഘടിപ്പിക്കും. വനിതാ യാത്രാവാരത്തിന്റെ ആദ്യ ട്രിപ്പിന്റെ ഫ്ലാഗ്ഓഫ് തിരുവനന്തപുരം സെൻട്രൽ യൂണിറ്റിൽ രാവിലെ ആറരക്ക് നവകേരള മിഷൻ കോ-ഓർഡിനേറ്റർ ടി എൻ സീമ നിർവഹിക്കും. നിംസ് മെഡിസിറ്റിയിലെ വനിതാ ജീവനക്കാർ അവതരിപ്പിക്കുന്ന ഫ്ലാഷ് മോബ്, കലാപരിപാടികൾ എന്നിവയും ഉണ്ടാകും.
മൺറോതുരുത്ത്, സാബ്രാണ്ടിക്കോടി, തിരുമല്ല വാരം ബീച്ച് എന്നിവിടങ്ങളിലേക്ക് നിംസ് മെഡിസിറ്റി വനിതാ ജീവനക്കാർക്കായി നടത്തുന്ന ട്രിപ്പാണ് ആദ്യമായി നടത്തുന്നത്.
സംസ്ഥാനത്തുടനീളം 100 വനിതകൾ മാത്രമുള്ള ട്രിപ്പുകളാണ് ക്രമീകരിച്ചിരിക്കുന്നത്. കൊച്ചി വണ്ടർലായുമായി സഹകരിച്ച് 20 ട്രിപ്പുകളും നടത്തും. താമരശേരി യൂണിറ്റിൽ നിന്ന് 16 വനിതാ ഉല്ലാസ യാത്രകളാണ് നടത്തുന്നത്.
തിരുവനന്തപുരം സോഷ്യൽ സർവീസ് സൊസൈറ്റിയുമായി സഹകരിച്ച് തീരദേശ വനിതകൾ പങ്കെടുക്കുന്ന നാല് ദിവസം നീളുന്ന തിരുവനന്തപുരം – കോഴിക്കോട് വനിതായാത്രയും നടത്തുന്നുണ്ട്. നവജീവൻ ട്രസ്റ്റ് കോട്ടയത്തിന് കീഴിൽ പ്രവർത്തിക്കുന്ന സ്നേഹക്കൂട്ടിലെ വനിതാ അന്തേവാസികൾക്കായി വാഗമണ്ണിലേക്ക് സ്നേഹ സ്വാന്തനയാത്രയും സംഘടിപ്പിച്ചിട്ടുണ്ട്.
വനിതകൾക്ക് സുരക്ഷിതമായും സൗകര്യപ്രദമായും ഉല്ലാസയാത്ര നടത്താം എന്ന സന്ദേശമാണ് വനിതാ യാത്രാ വാരത്തിലൂടെ കെഎസ്ആർടിസി ബഡ്ജറ്റ് ടൂർസ് മുന്നോട്ട് വയ്ക്കുന്നത്.