കോട്ടയം പാലായിൽ ഗർഭിണിയുടെ വയറിനു ചവിട്ടി പരിക്കേൽപ്പിച്ച നാലുപേരെ പൊലീസ് അറസ്റ്റ് ചെയ്തു. പാലാ ഞൊണ്ടിമാക്കല്‍ കവലയിലാണ് സംഭവം. അതിക്രമം തടഞ്ഞ യുവതിയുടെ ഭർത്താവിനെയും അക്രമികൾ മർദിച്ചു. പാലാ സ്വദേശികളായ ജിന്‍സി, ഭര്‍ത്താവ് അഖില്‍ എന്നിവരാണ് ആക്രമണത്തിന് ഇരയായത്. യുവതിയോട് അശ്ലീലമായി സംസാരിച്ചത് ഭര്‍ത്താവ് ചോദ്യം ചെയ്തതാണ് ആക്രമണത്തില്‍ കലാശിച്ചത്. പ്രതികള്‍ ഭര്‍ത്താവിനെ അടിച്ചുവീഴ്ത്തി. ദമ്പതിമാരെ വാഹനം കൊണ്ട്വാ ഇടിച്ചുതെറിപ്പിക്കാൻ ശ്രമിച്ചതായും പരാതിയുണ്ട്.
സംഭവത്തിൽ വര്‍ക്ക്‌ഷോപ്പ് ഉടമകളായ പൂവരണി പാറപ്പള്ളി കറുത്തേടത്ത് ശങ്കര്‍ കെ എസ് (39), അമ്പാറ നിരപ്പേല്‍ പ്ലാത്തോട്ടത്തില്‍ ജോണ്‍സണ്‍ (38), വര്‍ക്ക്‌ഷോപ്പിലെ തൊഴിലാളികളായ നരിയങ്ങാനം ചെമ്പന്‍പുരയിടത്തില്‍ ആനന്ദ് (23), മേവട വെളിയത്ത് സുരേഷ് (55) എന്നിവരെയാണ് പാലാ പൊലീസ് അറസ്റ്റ് ചെയ്തത്.
വയറിന് ചവിട്ടേറ്റ യുവതി പാലാ ജനറല്‍ ആശുപത്രിയില്‍ ചികിത്സയിലാണ്. പരിക്കേറ്റതിനെതുടര്‍ന്ന് യുവതിക്ക് രക്തസ്രാവം ഉണ്ടായി. എന്നാൽ, ആരോഗ്യസ്ഥിതി ഗുരുതരമല്ല. ആക്രമണ ശേഷം കടന്നുകളഞ്ഞ പ്രതികളെ ഇന്ന് രാവിലെ പൊലീസ് പിടികൂടുകയായിരുന്നു.