സ്ത്രീധനത്തിനുവേണ്ടി ഭാര്യയുടെ നഗ്ന ചിത്രങ്ങളെടുത്ത് സാമുഹിക മാധ്യമങ്ങളില്‍ പ്രചരിപ്പിക്കുമെന്ന് ഭീഷണിപ്പെടുത്തിയ ഐ ടി ജീവനക്കാരന്‍ അറസ്റ്റില്‍. കോയമ്പത്തൂരിലെ സ്വകാര്യ ഐ ടി കമ്പനി ജീവനക്കാരൻ സി പിച്ചൈമുത്തുവിനെയാണ് പൊലീസ് അറസ്റ്റ് ചെയ്തത്. ബാങ്ക് ജീവനക്കാരിയായ ഭാര്യയെ നിരന്തരം മാനസികമായും ശാരീരികമായും പീഡിപ്പിക്കുന്നത് പതിവായിരുന്നു. മുഖക്കുരുവുള്ളതിനാല്‍ കൂടെ ജീവിക്കാന്‍ താല്‍പര്യമില്ലെന്നും സ്ത്രീധനമായി പുതിയ വീട് വാങ്ങിത്തരണമെന്നുമായിരുന്നു ആവശ്യം.
പിച്ചൈമുത്തുവിന്‍റെ കുടുംബാംഗങ്ങളും യുവതിയെ പീഡിപ്പിച്ചിരുന്നതായി പരാതിയുണ്ട്. 2020 ഒക്ടോബര്‍ 29 നാണ് ഇരുവരും വിവാഹിതരായത്. വിവാഹസമയത്ത് യുവതിയുടെ വീട്ടുകാര്‍ വരന്‍റെ കുടുംബത്തിന് സ്വര്‍ണവും 5 ലക്ഷം രൂപയും നല്‍കിയിരുന്നു. ശനിയാഴ്ച ഭര്‍ത്താവിന്‍റെ മര്‍ദ്ദനത്തെ തുടര്‍ന്ന് യുവതിയെ കോയമ്പത്തൂർ മെഡിക്കല്‍ കോളജാശുപത്രിയില്‍ പ്രവേശിപ്പിച്ചു. തുടര്‍ന്നാണ് ഗാന്ധിപുരം മഹിള പൊലീസ് പ്രതിയെ അറസ്റ്റ് ചെയ്ത് ജയിലിലടച്ചത്.