വീട്ടിലേക്ക് മടങ്ങുകയായിരുന്ന ഇടിഞ്ഞാര്‍ ട്രൈബല്‍ സ്കൂളിലെ വിദ്യാര്‍ഥികളെ കാട്ടാന ഓടിച്ചു. ഇടിഞ്ഞാര്‍ ചെന്നെല്ലിമൂട്ടിലായിരുന്നു സംഭവം. കാനനപാതകളില്‍ വന്യമൃഗങ്ങളുടെ സാന്നിധ്യമുണ്ടാകാനുള്ള സാധ്യത മുന്നില്‍ കണ്ട് കൂട്ടമായാണ് വിദ്യാര്‍ഥികള്‍ കാല്‍നടയായി വീടുകളിലേക്ക് മടങ്ങുന്നത്.
അപ്രതീക്ഷിതമായി മുന്നില്‍പെട്ട ആനയെ കണ്ട് കുട്ടികള്‍ പിന്തിരിഞ്ഞോടി. സ്കൂളില്‍ തിരിച്ചെത്തി അധ്യാപകരോടും നാട്ടുകാരോടും വിവരം ധരിപ്പിച്ചു. അവര്‍ കൂട്ടമായി ആനയെ കാട്ടിലേക്ക് ഓടിച്ചുവിടുകയായിരുന്നു. പിന്നീട്, കുട്ടികളെ സ്വകാര്യ വാഹനങ്ങളില്‍ വീടുകളില്‍ കൊണ്ടെത്തിച്ചു.
കഴിഞ്ഞ ദിവസവും അഞ്ച് വിദ്യാര്‍ഥികളെ കാട്ടാന ഓടിച്ചിരുന്നു. ഇതേ പാതയില്‍ മകളുമായി കാല്‍നടയായി പോകുകയായിരുന്ന അച്ഛനെ കാട്ടുപോത്ത് ആക്രമിച്ചിട്ടും അധികം ദിവസമായില്ല.