കൊച്ചി: സംസ്ഥാന സീനിയര്‍ വനിത ഫുട്ബാള്‍ കിരീടം തൃശൂരിന്. എറണാകുളം മഹാരാജാസ് കോളജ് ഗ്രൗണ്ടില്‍ നടന്ന പോരാട്ടത്തില്‍ നിശ്ചിത സമയത്ത് ഗോള്‍ ഒന്നും വീഴാത്തതിനെത്തുടര്‍ന്ന് ഷൂട്ടൗട്ടിലാണ് തൃശൂര്‍ കോഴിക്കോടിനെ തോല്‍പിച്ചത്. സ്കോര്‍: 4-3.
തൃശൂരിനായി സിവിഷ, എസ്. നിദിയ, സി. രേഷ്മ, മഞ്ജു ബേബി എന്നിവര്‍ ഗോള്‍ നേടി. കെ. മാനസ, എസ്. കാര്‍ത്തിക, വേദവള്ളി എന്നിവര്‍ക്കാണ് കോഴിക്കോടിനായി ഗോള്‍വല കുലുക്കാനായത്. ലൂസേഴ്സ് ഫൈനലില്‍ മലപ്പുറത്തെ തോല്‍പിച്ച്‌ പത്തനംതിട്ട മൂന്നാം സ്ഥാനം നേടി. പെനാല്‍റ്റി ഷൂട്ടൗട്ടിലാണ് ഈ കളിയിലും വിധി നിര്‍ണയിച്ചത്.
നിശ്ചിത സമയത്ത് 1-1 ആയിരുന്നു സ്കോര്‍. പതിനാലാം മിനിറ്റില്‍ അര്‍ച്ചനയിലൂടെ മലപ്പുറമാണ് മുന്നില്‍ എത്തിയത്. 69ാം മിനിറ്റില്‍ നിഖില പത്തനംതിട്ടക്ക് സമനില നല്‍കി. കളി പെനാല്‍റ്റി ഷൂട്ടൗട്ടില്‍ എത്തിയപ്പോള്‍ 4-3ന് പത്തനംതിട്ട വിജയിച്ചു.
നിഖില, ഉണ്ണിമായ, ശ്രീലക്ഷ്മി, ഭാഗ്യശ്രീ എന്നിവര്‍ പത്തനംതിട്ടക്ക് വേണ്ടി പെനാല്‍റ്റി ഗോള്‍ നേടി. മലപ്പുറത്തിനായി അനഘ, കെ.എ. അക്ഷര, ടി. യാര മുഫീന എന്നിവരും ലക്ഷ്യം കണ്ടു.