കേന്ദ്രീയ/നവോദയ വിദ്യാലയങ്ങള്‍ ഉള്‍പ്പെടെ കേന്ദ്ര സര്‍ക്കാറിനു കീഴിലുള്ള സ്കൂളുകളിലും മറ്റും ഒന്നു മുതല്‍ എട്ടുവരെ ക്ലാസുകളില്‍ അധ്യാപക നിയമനത്തിനായുള്ള യോഗ്യതനിര്‍ണയ പരീക്ഷയായ സെന്‍ട്രല്‍ ടീച്ചര്‍ എലിജിബിലിറ്റി ടെസ്റ്റ് ഡിസംബര്‍ 12 മുതല്‍ ജനുവരി 13 വരെ ദേശീയതലത്തില്‍ നടത്തും. സി.ബി.എസ്.ഇ ന്യൂഡല്‍ഹിയിലാണ് പരീക്ഷ സംഘടിപ്പിക്കുന്നത്. രണ്ടര മണിക്കൂര്‍ ദൈര്‍ഘ്യമുള്ള കമ്ബ്യൂട്ടര്‍ അധിഷ്ഠിത ‘സി-ടെറ്റ്’ രാവിലെ 9.30 മുതല്‍ ഉച്ചക്ക് 12 മണി വരെയും ഉച്ചക്കുശേഷം 2.30 മുതല്‍ അഞ്ചു മണി വരെയും രണ്ടു ഷിഫ്റ്റുകളായാണ് നടത്തുന്നത്.
മള്‍ട്ടിപ്പിള്‍ ചോയ്സ് മാതൃകയിലുള്ള ടെസ്റ്റില്‍ രണ്ടു പേപ്പറുകളുണ്ട്. പേപ്പര്‍ ഒന്ന്, ഒന്നു മുതല്‍ അഞ്ചുവരെ ക്ലാസുകളിലേക്കും പേപ്പര്‍ രണ്ട്, ആറു മുതല്‍ എട്ടുവരെ ക്ലാസുകളിലേക്കും അധ്യാപകരാകാനുള്ളതാണ്. മലയാളം, ഇംഗ്ലീഷ്, ഹിന്ദി, തമിഴ്, സംസ്കൃതം, കന്നട, തെലുങ്ക് ഉള്‍പ്പെടെ 20 ഭാഷകളില്‍ പരീക്ഷയെഴുതാം. പരീക്ഷക്കായി രണ്ടു ഭാഷകള്‍ തിരഞ്ഞെടുക്കാം. പരീക്ഷഘടനയും സിലബസും യോഗ്യത മാനദണ്ഡങ്ങളും സെലക്ഷന്‍ നടപടിയുമെല്ലാം അടങ്ങിയ വിജ്ഞാപനവും ‘സി-ടെറ്റ്’ ഇന്‍ഫര്‍മേഷന്‍ ബുള്ളറ്റിനും https://ctet.nic.inല്‍നിന്ന് ഡൗണ്‍ലോഡ് ചെയ്യാം.കേരളത്തില്‍ ആലപ്പുഴ, എറണാകുളം (കൊച്ചി), ഇടുക്കി, കണ്ണൂര്‍, കാസര്‍കോട്, കൊല്ലം, കോട്ടയം, കോഴിക്കോട്, മലപ്പുറം, പാലക്കാട്, തിരുവനന്തപുരം, തൃശൂര്‍ എന്നിവയും ലക്ഷദ്വീപില്‍ കവരത്തിയുമാണ് പരീക്ഷകേന്ദ്രങ്ങള്‍. മുന്‍ഗണനാക്രമത്തില്‍ നാലു കേന്ദ്രങ്ങള്‍ പരീക്ഷക്കായി തിരഞ്ഞെടുക്കാം.അപേക്ഷ ഓണ്‍ലൈനായി https://ctet.nic.inല്‍ സമര്‍പ്പിക്കാം. ഒക്ടോബര്‍ 19 വരെ അപേക്ഷ സ്വീകരിക്കും.