ലോക്ഡൗൺ സമയത്ത് മദ്യത്തിൻറെ ഓൺലൈൻ ബുക്കിംഗിനും വിതരണത്തിനും അനുമതി നൽകി ഡൽഹി സർക്കാർ. ആവശ്യക്കാർക്ക് മദ്യം മൊബൈൽ ആപ്പിലൂടെയോ വെബ് പോർട്ടലിലൂടെയോ ബുക്ക് ചെയ്യാം. ബുക്ക് ചെയ്യുന്ന മദ്യം വീടുകളിൽ എത്തിക്കും. ഇന്ത്യൻ, വിദേശ നിർമിത മദ്യങ്ങൾ ഓൺലൈനായി ഓർഡർ ചെയ്യാൻ അവസരം ലഭിക്കും.
എൽ -13 ലൈസൻസ് കൈവശമുള്ള വ്യാപാരികൾക്ക് മാത്രമേ ഹോം ഡെലിവറിക്ക് അനുമതി നൽകൂ. വീടുകളിലേക്കുള്ള ഓർഡറുകൾ മാത്രമേ സ്വീകരിക്കൂ. ഹോസ്റ്റൽ, ഓഫീസ് സ്ഥാപനങ്ങൾ എന്നിവിടങ്ങളിലേക്കുള്ള ബുക്കിംഗ് സ്വീകരിക്കില്ലെന്ന് ഇതു സംബന്ധിച്ചുള്ള വിജ്ഞാപനത്തിൽ പറയുന്നു.
കേരളത്തിലും സമാന സജ്ജീകരണം വേണമെന്ന് നേരത്തെ ആവശ്യം ഉയർന്നിരുന്നു. എന്നാൽ, ഓൺലൈൻ മദ്യവിൽപ്പനയെ കുറിച്ച് ഇപ്പോൾ ആലോചനയില്ലെന്നാണ് എക്‌സൈസ് മന്ത്രി എം.വി.ഗോവിന്ദൻ കഴിഞ്ഞ ദിവസം പറഞ്ഞത്.