ടൗട്ടേ ചുഴലിക്കാറ്റിൽ മുംബൈയിൽ നിയന്ത്രണം വിട്ട ബാർജ് അപകടത്തിൽപെട്ട സംഭവത്തിൽ മരിച്ച മലയാളികളുടെ എണ്ണം മൂന്നായി. കൽപ്പറ്റ മൂപ്പൈനാട് സ്വദേശി വി.എസ്. സുമേഷിൻറെ മൃതദേഹം തിരിച്ചറിഞ്ഞു. വയനാട് കൽപറ്റ സ്വദേശി ജോമിഷ് ജോസഫ് (35), കോട്ടയം ചിറക്കടവ് മൂങ്ങാത്രക്കവല അരിഞ്ചിടത്ത് സസിൻ ഇസ്മയിൽ (29) എന്നിവരാണ് മരിച്ച മറ്റ് മലയാളികൾ.
ഇതോടെ, ബാർജ് ദുരന്തത്തിൽ മരിച്ചവരുടെ എണ്ണം 49 ആയി ഉയർന്നു. ഇനിയും കണ്ടെത്താനുള്ള 26 പേർക്കായി തെരച്ചിൽ തുടരുകയാണ്.മുംബൈയിൽനിന്ന് 38 നോട്ടിക്കൽ മൈൽ അകലെ ഹീര ഓയിൽ ഫീൽഡിനു സമീപം കാറ്റിനെത്തുടർന്നാണ് ബാർജ് (കൂറ്റൻ ചങ്ങാടം) അപകടത്തിൽപ്പെട്ടത്.
പി 305 നമ്പർ ബാർജ് തിങ്കളാഴ്ചയോടെ പൂർണമായും മുങ്ങിയിരുന്നു. ബാർജിൽ ഉണ്ടായിരുന്ന 261 പേരിൽ 186 പേരെ നാവികസേന സുരക്ഷിത കേന്ദ്രങ്ങളിലെത്തിച്ചിരുന്നു. വരപ്രദ എന്ന ടഗ്ബോട്ടിലുണ്ടായിരുന്ന രണ്ടുപേരെയും രക്ഷപ്പെടുത്തിയിരുന്നു.