കോവിഡ് ബാധിച്ച്‌ മരിക്കുന്നവരുടെ എണ്ണം കൂടിയ സാഹചര്യത്തിൽ ബംഗളുരുവിലെ ശ്മശാനങ്ങള്‍ ഓണ്‍ലൈന്‍ ആയി ബുക്ക് ചെയ്യാന്‍ ഹെല്‍പ്പ്ലൈന്‍ സൗകര്യമൊരുക്കി കര്‍ണാടക. ഒരാള്‍ വീട്ടിലോ ആശുപത്രിയിലോ മരിച്ചാല്‍ അവരുടെ ബന്ധുക്കള്‍ക്ക് 24×7 ഹെല്‍പ്പ് ലൈന്‍ നമ്പറായ +91 8495998495 ല്‍ വിളിച്ചോ വാട്സ് ആപ്പ് വഴി സന്ദേശം അയച്ചോ ശ്മശാനം ബുക്ക് ചെയ്യാം. സംസ്കാര തീയതി, സമയം, സ്ഥലം എന്നിവയും മരിച്ചയാളുടെ അന്തിമ ചടങ്ങുകള്‍ നടത്തുന്നതിന് ആവശ്യമായ മറ്റ് വിവരങ്ങളും നല്‍കണം. തുടര്‍ന്ന് ടോക്കണ്‍ നമ്പർ എസ്.എം.എസായി ലഭിക്കും. ഇത് ശ്മശാന അധികൃതരെ കാണിക്കുന്നതോടെ സംസ്കാര ചടങ്ങുകള്‍ നടത്താനുള്ള അവസരം ലഭിക്കും.
പീനിയ, കെങ്കേരി, സമ്മനഹള്ളി, പനാറ്റൂര്‍, ഹെബ്ബല്‍, കലഹള്ളി, കുഡ്‌ലു, ഹരിചന്ദ്രഘട്ട്, മൈസൂര്‍ റോഡ്, ബനശങ്കരി, വില്‍സണ്‍ ഗാര്‍ഡന്‍, ചാമരാജ്‌പേട്ട്, ഗിദ്ദനഹള്ളി, തവാരേക്കരെ, ടി.ആര്‍ മില്‍സ്, മവല്ലിപുര, ദേവല്ലിപുര എന്നീ ശ്മശാനങ്ങളിലാണ് ഓണ്‍ലൈന്‍ വഴി ബുക്ക് ചെയ്യാന്‍ നിലവില്‍ സൗകര്യമുള്ളത്. കോവിഡ് ബാധിച്ച്‌ മരിച്ചവരെ കൊണ്ടുപോകുന്നതിന് ആംബുലന്‍സും സംസ്കാരത്തിന് ശ്മശാനവും യാതൊരു ഫീസും ഈടാക്കരുതെന്ന ഉത്തരവ് ഇതിലും ആവര്‍ത്തിച്ചിട്ടുണ്ട്.